ក្នុងឱកាសទិវាជនមានពិការភាពកម្ពុជាលើកទី ២៥ និងទិវាជនមានពិការភាពអន្តរជាតិលើកទី ៤១ ក្រោមប្រធានបទ «ដំណោះស្រាយប្រកបដោយនវានុវត្តន៍ ដើម្បីសង្គមមួយមានផាសុកវត្ថុ និង​សមធម៌» ថ្ងៃទី៣ ខែធ្នូ ឆ្នាំ២០២៣នេះ សម្ដេចមហាបវរធិបតី ហ៊ុន ម៉ាណែត នាយករដ្ឋ​មន្រ្ដី​នៃ​កម្ពុជា បានណែនាំ​ឱ្យផ្សព្វ​ផ្សាយ​អំពី​ប្រវត្តិ​ទិវា​ជន​មាន​ពិការភាព​កម្ពុជា​ដល់​សង្គម​ជាតិ​ទាំង​មូល​បាន​យល់​ជ្រួតជ្រាបអំពីទិវានេះ។

សារាចរណែនាំរបស់សម្ដេចធិបតី នាយករដ្ឋមន្រ្ដី អំពីការរៀបចំទិវាជនមានពិការភាពនេះ​បា​នឱ្យ​ដឹង​ថា ទិវាជនមានពិការភាពអន្តរជាតិត្រូវបានប្រារព្ធឡើង ដើម្បីរំលឹក​អំពីការតស៊ូទាមទារ​សិទ្ធិ​ចូលរួម​ក្នុង​សង្គមរបស់ ជនមានពិការភាពប្រមាណ ១,៣ ពាន់លាននាក់​នៃប្រ​ជាជន​សរុប​នៅ​ក្នុង​ពិភពលោក ដែលជាជនបាត់បង់កាយសម្បទា ញាណដឹង និងសតិបញ្ញា ហើយ​តែង​តែ​ជួប​ប្រទះ​ឧបសគ្គ​រា​រាំងក្នុងជីវិតរស់នៅប្រចាំថ្ងៃចាប់ពីឆ្នាំ១៩៥០ រហូតដល់បច្ចុប្បន្ន សំដៅផ្លាស់​ប្ដូរ​ស្ថានភាព​រស់​នៅរបស់ពួកគាត់ និងបង្កើន​ការយល់ដឹ​ង​អំពី​បញ្ហា​ពិការ​ភាព​ដោយ​ផ្តោត​សំខាន់​លើ​សិទ្ធិ និងសេចក្តីថ្លៃថ្នូររបស់ជនមានពិការភាព ព្រមទាំងការធ្វើបរិយាបន្នពិការភាព​ទៅ​គ្រប់​សកម្មភាព និង​គ្រប់វិស័យក្នុងសង្គម រួមមាន សកម្មភាពនយោបាយ សេដ្ឋកិច្ច សង្គម វប្បធម៌ សិល្បៈ និងកីឡា។

ដោយឡែក ព្រះរាជាណាចក្រកម្ពុជា ប្រារព្ធទិវាជនមានពិការភាពកម្ពុជាឡើង ដើម្បី​រំលឹក​អំពី​មហាវិនាសកម្ម នៃ​របបប្រល័យពូជសាសន៍ ប៉ុល ពត ដែលបានបន្សល់ទុកនូវផលវិបាកជាច្រើន ក្នុងនោះ រួមមាន ជនមានពិការភាព ស្ត្រីមេម៉ាយ និងកុមារកំព្រា។ មរតកនៃ​សង្គ្រាម​ក៏​បាន​បន្សល់​ទុក​នូវ​គ្រាប់មីន និងកាកសំណល់ជាតិផ្ទុះជាច្រើនរាយប៉ាយពាសពេញផ្ទៃប្រទេស ជាពិសេស​គ្រាប់​បែក​ចង្កោមមានផ្ទុកសារជាតិគីមីដែលបានរកឃើញជាច្រើននៅកម្ពុជា។ ក្រៅពីនោះ ប្រជាជន​កម្ពុជា ក៏ប្រឈមនឹងភាពរងគ្រោះមួយចំនួនទៀតដែលនាំឱ្យមានពិការភាព ដូចជា​គ្រោះ​ថ្នាក់​ចរាចរណ៍គ្រោះថ្នាក់ ការងារ ពិការភាពពីកំណើតចាស់ជរា ជំងឺរ៉ាំរ៉ៃ និងមូល​ហេតុ​ផ្សេង​ៗ​ទៀត​។

ដើម្បីអបអរសាទរទិវាជនមានពិការភាពកម្ពុជាលើកទី២៥ និងទិវាជន​មាន​ពិការភាព​អន្តរជាតិ​ លើកទី៤១ ឆ្នាំ២០២៣នេះ រាជរដ្ឋាភិបាលបានណែនាំឱ្យ ក្រសួងព័ត៌មាន ត្រូវសហការ​ជាមួយ​ក្រុម​ប្រឹក្សា​សកម្មភាពជនពិការណែនាំប្រព័ន្ធឃោសនារដ្ឋ និងឯកជន​ឱ្យ​ធ្វើការ​ផ្សព្វ​ផ្សាយ​ដល់​សង្គម​ជាតិ​ទាំងមូលឱ្យបានយល់ជ្រួតជ្រាបអំពីប្រវត្តិនៃទិវាជនមានពិការភាពកម្ពុជា និងទិវាជន​មាន​ពិការ​ភាព​អន្តរជាតិ៣ធ្នូ។

ណែនាំដល់​​គ្រប់ក្រសួង ស្ថាប័ន រដ្ឋបាលរាជធានី ខេត្ត ដៃគូពាក់ព័ន្ធ ត្រូវរៀបចំពិធីមីខ្ទីង ពិធីជួប​សំណេះ​សំណាលជាមួយ ជនមានពិការភាព កម្មវិធី​កម្សាន្ដ​សប្បាយ​សម្រាប់​ជន​មាន​ពិការ​ភាព​នៅ​តាម​ក្រសួង ស្ថាប័ន រដ្ឋបាល រាជធានី ខេត្ត គ្រឹះស្ថានសិក្សារដ្ឋ ឯកជន អង្គការ​មិន​មែន​រដ្ឋាភិបាល និងគ្រប់មណ្ឌលនៅក្នុងមូលដ្ឋានរៀងៗខ្លួន។

ចំណែក​ក្រុមប្រឹក្សាសកម្មភាពជនពិការ ក្រសួងសង្គមកិច្ច អតីតយុទ្ធជន និងយុវនីតិសម្បទា ក្រសួង​ការងារ និង បណ្តុះបណ្តាលវិជ្ជាជីវៈ ក្រសួងសុខាភិបាល ក្រសួងអប់រំ យុវជន និងកីឡា មូល​និធិជនពិការ គណៈកម្មាធិការជាតិ រៀបចំបុណ្យជាតិនិងអន្តរជាតិ រដ្ឋបាលរាជធានីភ្នំពេញ និង​ស្ថាប័នពាក់ព័ន្ធត្រូវសហការរៀបចំពិធីមីផ្ទាំងថ្នាក់ជាតិ និងរៀបចំកម្មវិធីកម្សាន្តផ្សេងៗ សម្រាប់​ជនមានពិការភាពនៅរាជធានីភ្នំពេញ។

គ្រប់​ក្រសួង ស្ថាប័ន រដ្ឋបាលរាជធានី ខេត្ត និងគ្រឹះស្ថានសាធារណៈនិងឯកជន ត្រូវរៀប​ចំចង​បដា ពាក្យស្លោក ដើម្បីអបអរសាទរទិវាជនមានពិការភាពកម្ពុជាលើកទី ២៥ និង​ទិវា​ជន​មាន​ពិការភាព​អន្តរជាតិលើកទី៤១ផងដែរ៕ អត្ថបទ៖ វ៉ន ដារ៉ា