តាមរយៈដំណើរទស្សនកិច្ចរបស់គណៈប្រតិភូជាន់ខ្ពស់រដ្ឋសភា នៃព្រះរាជាណាចក្រកម្ពុជា ដឹកនាំ​ដោយ​សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៅសាធារណរដ្ឋ​សង្គម​និយម​វៀតណាម ពីថ្ងៃទី ៣០ ខែវិច្ឆិកា ដល់ថ្ងៃទី ២ ខែធ្នូ ឆ្នាំ២០២៣ ភាគីទាំងពីរ​បាន​ឯកភាព​រួម​គ្នា​ពូន​ជ្រុំ និងផ្សព្វផ្សាយវប្បធម៌នៃទំនាក់ទំនងដ៏ល្អ និងកម្រ​របស់​ប្រទេស​ទាំងពីរ​ដល់​យុវជន​ជំនាន់​ក្រោយ​ឱ្យ​បានដឹង និងបន្តថែរក្សាឱ្យបានស្ថិតស្ថេរគង់វង្សយូរអង្វែង។

តាមរយៈដំណើរទស្សនកិច្ច របស់​គណៈប្រតិភូ​ជាន់​ខ្ពស់​រដ្ឋសភា​កម្ពុជា​នៅ​សាធារណរដ្ឋ​សង្គម​និយម​វៀតណាមនេះសម្តេចរដ្ឋសភាធិបតី បានជួបសម្ដែងការគួរសមជាមួយ ឯកឧត្តម ង្វៀន ភូជុង (NGUYEN Phu Trong) អគ្គលេខាធិការបក្សកុម្មុយនីសវៀតណាម ឯកឧត្តម វូ វ៉ាន់ធួង (VO Van Thuong) ប្រធានរដ្ឋវៀតណាម និងបានជួបពិភាក្សាការងារទ្វេភាគីជាមួយ ឯកឧត្តម វឿង ឌិញហ្វេ ប្រធានរដ្ឋសភា នៃសាធារណរដ្ឋសង្គមនិយមវៀតណាម និង​បាន​ទទួល​ជួប​សម្ដែង​ការ​គួរ​សមជាមួយប្រតិភូសមាគមមិត្តភាពវៀតណាម-កម្ពុជា ព្រមទាំង​បាន​អញ្ជើញ​ទៅ​បំពេញ​ទស្សន​កិច្ច​នៅខេត្តហាណាម ដើម្បីសិក្សាឈ្វេងយល់ពីវិស័យទេសចរណ៍ កសិកម្មបែបទំនើប និង​ព្រះពុទ្ធសាសនា ដើម្បី​ផ្សព្វផ្សាយជូនពលរដ្ឋផងដែរ។

គ្រប់ជំនួបពិភាក្សាការងារ សម្តេចរដ្ឋសភាធិបតី និងសមភាគីវៀតណាម បានលើកឡើង​អំពី​ទំនាក់​ទំនង​ដ៏​ល្អរវាង ព្រះរាជាណាចក្រកម្ពុជា និងប្រទេសវៀតណាម​ដែល​មាន​តាំង​ពីយូរ​លង់​មក​ហើយ និងត្រូវបានពូនជ្រំឡើងដោយថ្នាក់ដឹកនាំ ប្រទេសទាំងពីរនៅគ្រប់ជំនាន់ ទំនាក់ទំនង​ នៃ​ប្រទេស​ទាំង​ពីរ​បានផ្ដើមឡើងពីការប្រកៀកស្មាគ្នាដើម្បីបញ្ចប់សង្គ្រាម បង្រួបបង្រួមទឹកដី និង​ឯករាជ្យ​ជាតិ។ ទំនាក់ទំនងជាប្រពៃណីអ្នកជិតខាងល្អដៃគូសហប្រតិបត្តិការជានិរន្តរ៍ មាន​ការ​រីក​ចម្រើន​ឥត​ឈប់ឈរដោយឈរលើស្មារតីស្មោះត្រង់ ទំនុកចិត្ត និងការយោគយ​ល់​គ្នាទៅ​វិញ​ទៅ​មក សំដៅសម្រេចបាននូវផលប្រយោជន៍ដល់ប្រទេស និងប្រជាជាតិ​ទាំង​សង​ខាង​ស្រប​តាម​ទិស​ស្លោក «អ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ ជ្រុងជ្រោយ យូរអង្វែង និងជានិរន្តរ៍»។

ភាគីទាំងពីរបានឯកភាពរួមគ្នានៅក្នុងការពូនជ្រុំ និងផ្សព្វផ្សាយ​វប្បធម៌​នៃ​ទំនាក់​ទំនង​ដ៏​ល្អនិ​ង​កម្រ​នេះ ​ដល់យុវជន ជំនាន់ក្រោយឱ្យបានដឹង និងបន្តថែរក្សាឱ្យបានស្ថិតស្ថេរគង់វង្ស យូរអង្វែង។ ទំនាក់ទំនងកិច្ចសហប្រតិបត្តិការរវាងប្រទេសជិតខាងនេះ មិនត្រឹមតែបានផ្ដល់នូវសុខសន្តិភាព និ​ង​ការអភិវឌ្ឍដល់ប្រទេសទាំងពីរប៉ុណ្ណោះទេ ប៉ុន្ដែថែមទាំងបានរួមចំណែកដល់ ការកសាង​សន្តិភាព ស្ថិរភាព និងវិបុលភាពនៅក្នុងតំបន់ និងពិភពលោកទាំងមូលថែមទៀត៕