ឯកឧត្តមបណ្ឌិត ថោង ខុន ទេសរដ្ឋមន្ត្រី និងជា​ប្រធាន​គណៈកម្មាធិការ​ជាតិ​អូឡាំពិក​កម្ពុជា​(NOCC) ត្រូវបានក្លិបឆ្នេរសមុទ្រដែលស្អាតបំផុតលើពិភពលោក បោះឆ្នោត​ជា​ឯកច្ឆន្ទ​ជ្រើស​តាំង​ជា​សមាជិកកិត្តិយស និងត្រូវបានលោក Louis Thebault ប្រធាន​ក្លិប​ឆ្នេរ​សមុទ្រ​ដែល​ស្អាត​បំផុត​លើ​ពិភព​លោក នាំយកមកប្រគល់ជូនឯកឧត្តមដោយផ្ទាល់ ក្នុង​ឱកាស​ទិវា​រត់​ប្រណាំង​អន្ដរជាតិ​ពាក់​កណ្ដាល​ម៉ារ៉ាតុងអង្គរវត្ត លើកទី២៨ នៅមុខប្រាសាទអង្គរវត្ត នៅថ្ងៃទី០៣ ខែធ្នូ ឆ្នាំ២០២៣។

ឯកឧត្តមទេសរដ្ឋមន្ដ្រី បានសម្ដែងនូវសេចក្ដីរំភើបរីករាយ និងមោទនភាពជាខ្លាំង ដែលទទួលបានសេចក្ដីទុកចិត្ត និងការផ្ដល់កិត្តិយសដ៏ធំធេងពីអង្គមហាសន្និបាតក្លិបឆ្នេរសមុទ្រដែលស្អាតបំផុតលើពិភពលោកជ្រើសតាំងឯកឧត្តមជាសមាជិកកិត្តិយស។ ឯកឧត្តមថា សញ្ញាបត្រកិត្តិយសនេះ បានមកដោយសារការដឹកនាំដ៏ឈ្លាសវៃប្រកបដោយគតិបណ្ឌិតរបស់សម្ដេចតេជោអតីតនាយករដ្ឋមន្ដ្រី និងសម្ដេចធិបតីនាយករដ្ឋមន្ដ្រីបច្ចុប្បន្ន ដែលកន្លងមកសម្ដេចទាំងពីរ បានដឹកនាំដ៏អស្ចារ្យ ព្រមទាំងគ្រប់ស្ថាប័នពាក់ព័ន្ធទាំងអស់ផងដែរ ។

លោក Louis Thebault បានឲ្យដឹងថា ការបោះឆ្នោតជាឯកច្ឆន្ទជ្រើសតាំងឯកឧត្តមបណ្ឌិត ថោង ខុន ជាសមាជិកកិត្តិយសនេះ បន្ទាប់​ពី​អង្គ​មហា​សន្និបាត​ក្លិប​ឆ្នេរ​សមុទ្រ​ដែល​ស្អាត​បំផុត​លើ​សកល​លោក កាលពីថ្មីៗ បានចាត់ទុកឯកឧត្តម គឺជាឥស្សរជនដ៏ឆ្នើម តាំងពីដំណាក់កាលដំបូង នៃ​ការដាក់បញ្ចូលឆ្នេរសមុទ្រកម្ពុជា ចូលជាសមាជិកក្លិបឆ្នេរដែលស្អាតបំផុតលើពិភបលោក តាំង​ពី​ឆ្នាំ​២០១០ និងយន្ដការជាបន្ដបន្ទាប់ ដូចជាគណៈកម្មការគ្រប់ក្រង និង​អភិវឌ្ឍន៍​ឆ្នេរ​សមុទ្រ​កម្ពុជា និងការរៀបចំបុណ្យសមុទ្រជាដើម។

លោកបន្ដថា ឆ្នេរសមុទ្រកម្ពុជា បានបង្ហាញអំពីភាពស្រស់ស្អាតរបស់ខ្លួន សក្ដានុពលជាច្រើន រាប់​បញ្ចូល​តាំង​ពីកោះ ទីក្រុង តំបន់ព្រៃកោងកាងជាដើម ពិសេស​បន្ទាប់​ពី​ខ្ញុំបា​ន​ទៅ​ទស្សន​កិច្ច​នៅ​តំបន់​ឆ្នេរ​ខេត្តកំពត គឺឆ្នេរសមុទ្រកម្ពុជា នៅតែបង្ហាញពីភាពស្រស់ស្អាតរបស់ខ្លួន តាំងពីចូល​ជា​សមាជិក​ក្លិប។ តាមរយៈនេះ លោកបានកោតសរសេរ ចំពោះឯកឧត្តម ថោង ខុន ដែលកន្លងមក​ជា​រដ្ឋ​មន្ដ្រី​ផង និងជាតំណាងក្លិបឆ្នេរសមុទ្រកម្ពុជាផង បានធ្វើកិច្ចការជាច្រើន រហូតធ្វើ​ឲ្យ​អន្ដរជាតិ​ស្ងើច​សរសើរពីការគ្រប់គ្រងតំបន់ឆ្នេរនៅកម្ពុជា៕ អត្ថបទ៖ លី ឈុនឡា