ក្នុងឱកាសអបអរសាទរទិវាជនពិការអន្តរជាតិថ្ងៃទី៣ ខែធ្នូ ឆ្នាំ២០២៣នេះ ឯកឧត្តម លី ធុជ ទេសរដ្ឋមន្រ្តី អនុប្រធានទី១ អាជ្ញាធរមីន បានថ្លែងសារទៅកាន់ពិភពលោកថា កម្ពុជាប្តេជ្ញាចិត្ត ធានា និងផ្តល់តាមការសន្យាដែលបានធ្វើចំពោះជនរងគ្រោះដោយសារមីន ព្រមទាំង​បន្ត​ជំរុញ​ភាព​ជាដៃគូ​ជាមួយអនុសញ្ញាស្តីពីសិទ្ធិជនពិការ និងតម្រឹម​ការ​ខិតខំ​ជាមួយ​នឹង​គោល​ដៅ​អភិវឌ្ឍន៍​ប្រកប​ដោយ​ចីរភាព។

ក្នុងឱកាសទិវាជនមានពិការភាពកម្ពុជាលើកទី ២៥ និងទិវាជនមានពិការភាពអន្តរជាតិលើកទី ៤១ ក្រោមប្រធានបទ «ដំណោះស្រាយប្រកបដោយនវានុវត្តន៍ ដើម្បីសង្គមមួយមានផាសុកវត្ថុ និង​សមធម៌» ថ្ងៃទី៣ ខែធ្នូ ឆ្នាំ២០២៣នេះ ឯកឧត្តមបណ្ឌិត លី ធុជ បានថ្លែងថា កម្ពុជា​មិន​ត្រឹម​តែ​ឆ្លុះ​បញ្ចាំង​ពីបញ្ហាប្រឈមរបស់ក្មេងស្រី ក្មេងប្រុស បុរស និងស្ត្រីពិការភាពចំនួន ១.៣ ពាន់លាន​នាក់​នៅ​លើពិភពលោក រួមទាំងអ្នករស់រានមានជីវិតពីមីនប៉ុណ្ណោះទេ។ ប៉ុន្តែថែម​ទាំង​អបអរ​សាទរ​ចំពោះ​ការ​រួម​ចំណែក​ដ៏​មាន​តម្លៃ​ដែល​ជន​មាន​ពិការភាព​ដែល​បាន​ធ្វើ​ចំពោះ​សហគមន៍​ពិភព​លោក ចំពោះភាពរឹងមាំ និងភាពធន់របស់​ពួក​គេ​ជា​ពិសេស​នៅ​ពេល​ប្រឈម​មុខ​ជា​មួយ​គ្រោះអាសន្ន និងវិបត្តិមនុស្សធម៌។

ឯកឧត្តមបញ្ជាក់ថា អស់រយៈពេលជាង ២៥ ឆ្នាំ រដ្ឋភាគីនៃអនុសញ្ញានេះ រួមជា​មួយ​នឹង​សង្គម​ស៊ីវិល និងអង្គការតំណាងនៃអ្នករស់រានមានជីវិតពីមីន បាន​ខិតខំ​ប្រឹងប្រែង​យ៉ាង​សំខាន់​ឆ្ពោះទៅ​រក​ការ​ប្រែក្លាយពាក្យនៃអនុសញ្ញានេះទៅជាការពិត។ ផែនការសកម្មភាពអូស្លូ បានគូស​បញ្ជាក់​ពី​ការ​ប្តេជ្ញា​ចិត្ត​បន្តក្នុងការផ្តល់សិទ្ធិអំណាចដល់អ្នករស់រានមានជីវិតពីមីន គ្រួសារ និងសហគមន៍​ដែល​រង​ផលប៉ះពាល់។ កិច្ចខិតខំប្រឹងប្រែងទាំងនេះ ត្រូវតែ​បន្ត​ហើយ​ត្រូវ​តែ​ខិតខំ​ប្រឹង​ប្រែង​បន្ថែម​ទៀត ដើម្បីធានាឱ្យមានការចូលរួមពេញលេញ និង​ការ​ដាក់​បញ្ចូល​អ្នក​រស់​រាន​មាន​ជីវិត​រួច​ផុត​ពីមីន ដោយឈរលើមូលដ្ឋានស្មើភាពជាមួយអ្នកដទៃនៅក្នុងសង្គម។

សូមជម្រាបថា កម្ពុជាក្នុងនាមជាប្រធាននៃសន្និសីទត្រួតពិនិត្យលើកទី៥ «កិច្ចប្រជុំសៀមរាប-អង្គរ ស្តីពីពិភព លោកគ្មានមីន» ឆ្នាំ២០២៤ បានប្តេជ្ញាចិត្ត ធានា និង​ផ្តល់​តាម​ការ​សន្យា​ដែល​បាន​ធ្វើ​ចំពោះជនរង គ្រោះដោយសារមីន។ ការផ្តល់ដ៏សំខាន់នៃអនុសញ្ញានេះ គឺជាអាទិភាព​មួយ​ក្នុង​ចំណោម​អាទិភាពបីរបស់កម្ពុជា។ កម្ពុជាក៏នឹងធ្វើការរួមគ្នាជាមួយអ្នករស់រានមានជីវិតពីមីន អង្គការ​តំណាង និងជនមានពិការ ដើម្បីធានាបាននូវការ ចូលរួមយ៉ាងសកម្ម និងការ​ដាក់​បញ្ចូល​ក្នុង​កិច្ច​ខិតខំ​ប្រឹងប្រែងរបស់កម្ពុជាផងដែរ៕ អត្ថបទ៖ ភារម្យ