ឯកឧត្ដម ស៊ិក ប៊ុណ្ណា រដ្ឋលេខាធិការ តំណាងឯកឧត្ដមសាស្ត្រាចារ្យ ឈាង រ៉ា រដ្ឋមន្ត្រីក្រសួង​សុខាភិបាលបានលើកឡើងថា ក្រសួងសុខាភិបាល កសាងភាព​ជាដៃគូរឹងម៉ាំ​រវាង​វិស័យ​សុខាភិបាល​សាធារណៈ និងឯកជន ដើម្បីធ្វើឲ្យសុខភាពប្រជាជនកាន់តែល្អប្រសើរ។

ការថ្លែងរបស់ឯកឧត្ដម ស៊ិក ប៊ុណ្ណា យ៉ាងដូច្នេះ នាឱកាសដែលមន្ទីរពេទ្យរ៉ូយ៉ាល់ភ្នំពេញ អបអរ​សាទរ​ខួប​លើកទី៩ ឆ្នាំនាល្ងាចថ្ងៃទី០២ ខែធ្នូ ឆ្នាំ ២០២៣ ដោយ​មាន​ការ​អញ្ជើញ​ចូល​រួម​ពី​អ្នក​ឧកញ៉ា លី យ៉ុងផាត់។

ឯកឧត្តម រដ្ឋលេខាធិការ បន្តថា ក្រសួងសុខាភិបាល ក្រោមការដឹកនាំរបស់ឯកឧត្តមសាស្រ្តាចារ្យ ឈាង រ៉ា រដ្ឋមន្រី្ត បានដាក់ចេញនូវយុទ្ធសាស្រ្តគន្លឹះសំខាន់ៗ ដូចជា៖ ការពង្រីក​កែ​លម្អ​រចនា​សម្ព័ន្ធ ការបំពាក់ឧបករណ៍សម្ភារៈបរិក្ខារវេជ្ជសាស្ត្រ ការផ្គត់ផ្គង់ឱសថឲ្យបានគ្រប់គ្រាន់ ទាន់​ពេល​វេលា ការពង្រឹងគុណភាពសេវាថែទាំសុខភាព និងមនី្ទរពេទ្យបង្អែក ដោយ​ពង្រឹង​ទៅ​លើ​ផ្នែក​ប្រពោធន​កម្ម សង្រ្គោះបន្ទាន់ វៈកាត់ មនី្ទរពិសោធន៍ រូបភាពវេជ្ជសាស្រ្ត និងពង្រឹង​សមត្ថ​ភាព​មន្ត្រី​សុខាភិបាល​គ្រប់​កម្រិត។

ទន្ទឹមគ្នានោះដែរវេជ្ជបណ្ឌិត នីវ៉ាត់ អ៊ីនថារ៉ាវិចៀន(Niwat Intarawichian) នាយកមនី្ទរពេទ្យ រ៉ូយ៉ាល់ ភ្នំពេញ បានមានប្រសាសន៍ថា អស់រយៈពេល ៩ឆ្នាំមកហើយ ដែលមន្ទីរពេទ្យ រ៉ូយ៉ាល់ ភ្នំពេញ មើលថែសុខាភាពប្រជាជនកម្ពុជារាប់លាននាក់ និងផ្ដល់​សេវា​ថែទាំ​សុខភាព​លំដាប់​ពិភព​លោក ​ព្រមទាំងវេជ្ជសាស្ដ្រដ៏ល្អ ដូចគ្នាទៅនឹងមន្ទីរពេទ្យ បាងកក ប្រទេសថៃដែរ។

ចំណែក​លោកបណ្ឌិត ណារិនតារ៉ា ប៊ុនជុងចំរើន (Narintara Boonjongcharoen) នាយក​ប្រតិបតិ្ត ​ក្រុម​ទី៦ BDMS សង្កត់ធ្ងន់ថា បច្ចុប្បន្ននេះ BDMS បានពង្រីកសមត្ថភាពបន្ថែមទៀត ដោយ​ទទួលបានឧបករណ៍វេជ្ជសាស្ត្រកម្រិតខ្ពស់បន្ថែមទៀត ឧទាហរណ៍ យើងនឹងមាន 3 tesla MRI កម្រិតខ្ពស់ក្នុងត្រីមាសទី ១ ឆ្នាំ ២០២៤ នឹងជួលអ្នកឯកទេសផ្នែកវះកាត់តូចបំផុត អ្នក​ឯក​ទេស​បេះដូង​ថ្មី អ្នកឯកទេសត្រគាក និងជង្គង់ អ្នកឯកទេសខួរក្បាល និងឆ្អឹងខ្នង និងអនុឯក​ទេស​ជា​ច្រើន​សម្រាប់​តម្រូវ​ការរបស់អ្នកជំងឺ៕ អត្ថបទ រដ្ឋា