ក្រុមអ្នកវិនិយោគទុន និងទេសចរចិនជាង២០០នាក់ បានរួម​គ្នាដំ​ណើរ​ទេសចរ​បើក​បរ​រថយន្ត​ដោយ​ខ្លួន​ឯងពីខេត្តយូណានប្រទេសចិន មកកាន់ប្រទេសកម្ពុជា ក្រោមប្រធានបទ «វិថីសូត្រ​នៃ​រស្មីពណ៌​ខេត្ត​យូណាន» ដែលកំពុងស្នាក់នៅកម្ពុជា ចំនួន ៦ ថ្ងៃដើម្បីផ្សព្វ​ផ្សាយ​ឧស្សាហកម្ម​កីឡា​ផង និងទេសចរណ៍បើកបរដោយខ្លួនឯង ។

លោក Xing Jin, នាយករងនាយកដា្ឋនកីឡាខេត្តយូណានឲ្យដឹងនៅថ្ងៃទី២ ខែធ្នូនេះថា ក្រុម​អ្នក​វិនិយោគ​ទុនទេសចរណ៍កីឡានៃខេត្តយូណានប្រទេសចិន បាននិងកំពុងស្នាក់នៅកម្ពុជា ចំនួន ៦ ថ្ងៃ ចាប់ពីថ្ងៃទី២៨ ខែវិច្ឆិកាដល់ថ្ងៃទី៣ ខែធ្នូ ឆ្នាំ២០២៣នេះ ដោយ​ជិះ​រថយន្ត​បើកបរ​ដោយ​ខ្លួន​ឯង ទស្សនាកម្ពុជា នៅខេត្តស្ទឹងត្រែង ខេត្តព្រះវិហារ ប្រាសាទព្រះវិហារ ទស្សនារាជធានីភ្នំពេញ ខេត្តសៀមរាប ប៉ោយប៉ែត ដើម្បីផ្សព្វផ្សាយឧស្សាហកម្មទេសចរណ៍កីឡា នៅកម្ពុជា និង​ការ​ស្វែង​រក​ឱកាស​វិនិយោគនៅកម្ពុជាផង។

នៅក្នុងពិធីសន្និសិទ្ធផ្សព្វផ្សាយខ្សែទស្សនកិច្ចទេសចរណ៍បើកបរដោយខ្លួនឯង នៅសណ្ឋាគារ​សុខា​ភ្នំពេញនេះដែរ ឯកឧត្តម ហ៊ុល សីលា អនុរដ្ឋលេខាធិការក្រសួងទេសចរណ៍ បានថ្លែងថា នេះ​ជា​សន្និសីទលើកទី៦ ហើយក្រុមអ្នកវិនិយោគ និងទេសចរចិន បើកបរដោយខ្លួនឯង ពីខេត្ត​យូណាន គួនមិញ កាត់ប្រទេសឡាវ ចូលមកប្រទេសកម្ពុជា ឡើងវិញ ក្រោយ​ពី​ពិភពលោក​មាន​ ភាពធូរស្រាលការរាតត្បាតមេរោគកូវីដ១៩ និងចិនបានបើកប្រទេសឡើងវិញ។

ឯកឧត្តមបន្តថា តាមរយៈខ្សែទស្សនកិច្ចនេះ នឹងបង្កើនកិច្ចសហប្រតិបត្តិការលើកស្ទួយ និង​អភិវឌ្ឍន៍​វិស័យទេសចរណ៍ វប្បធម៌ កសិកម្មអប់រំនិងកីឡា និងសុខាភិបាល​ដល់​ប្រជាជន​ប្រទេស​ទាំង​ពីរ ឲ្យកាន់តែល្អប្រសើរឡើង ព្រមទាំ​ង​ជំរុញ​ការ​បើក​វគ្គ​បណ្តុះ​បណ្តាល​ធនធា​ន​មនុស្ស​លើ​ទេសចរណ៍​ថ្នាក់​ខ្ពស់ ក្នុងគោលបំណងហ្វឹកហាត់ជំនាញទេសចរណ៍ កីឡា ផ្តល់ថាមពល​ជា​វិជ្ជមាន​លើ​វិស័យទេសចរណ៍។

ឯកឧត្តម ហ៊ុល សីលា ថ្លែងថា តាមរយៈខ្សែទស្សនកិច្ចបើកបរដោយខ្លួនឯងនេះដែរ ភាគីចិន ក៏​មាន​គោល​បំណង ផ្សព្វផ្សាយ​ការ​អនុវត្ត​ខ្លឹមសារ​កា​រ​ចុះ​ហត្ថ​លេខា​លើ​កិច្ច​សហប្រតិបត្តិការតភ្ជាប់ជើងយន្តហោះត្រង់ ពីទីក្រុងឃុនម៉េង ខេត្តយូណាន មកកាន់​ទីក្រុង​សៀមរាប ដែលបានធ្វឡើងកាលពីអំឡុងខែវិច្ឆិកា ឆ្នាំ២០២១ ទីក្រុងតាលី ក្នុងខេត្តយូណាន និង​ផ្សព្វ​ផ្សាយ​ការរិតចំណងសាមគ្គីភាពខេត្តយូណាន ប្រទេសចិន និងខេត្តសៀមរាប ប្រទេស​កម្ពុជា​គឺ​ជា​ទំនាក់ទំនងខេត្តជាបងប្អូន (2-sister city)៕ អត្ថបទ៖ ស៊ុម សុខជា