អ៊ីស្រាអែលបានប្រឈមនឹងការអំពាវនាវរបស់សហរដ្ឋអាមេរិកកាន់តែខ្លាំងឡើង ដើម្បី​ជៀសវាង​ការបង្កគ្រោះថ្នាក់បន្ថែមទៀតដល់ជនស៊ីវិលប៉ាឡេស្ទីន ក្នុងការប្រយុទ្ធរបស់ខ្លួនប្រឆាំង​នឹង​ក្រុម​សកម្ម​ប្រយុទ្ធហាម៉ាសនៅតំបន់ហ្កាហ្សា ខណៈភាគីជម្លោះ​កាល​ពី​ថ្ងៃ​អាទិត្យ​ពុំ​បាន​បង្ហាញ​សញ្ញា​នៃ​ការ​ឈានឆ្ពោះទៅរកការរស់ឡើងវិញនូវបទឈប់បាញ់របស់ពួកគេឡើយ។

ស្របពេលកងកម្លាំងអ៊ីស្រាអែលវាយលុកតំបន់រងការឡោមព័ទ្ធមួយនេះ បន្ទាប់​ពី​បទ​ឈប់​បាញ់​បណ្តោះ​អាសន្នផុតកំណត់ អនុប្រធានាធិបតីអាមេរិកលោកស្រី Kamala Harris បាននិយាយថា ប្រជាជន​ប៉ាឡេស្ទីនស្លូតត្រង់ច្រើនយ៉ាងត្រូវបានសម្លាប់នៅតំបន់ហ្កាហ្សា ហើយ​រដ្ឋ​មន្ត្រី​ការពារ​ជាតិ​អាមេរិក​លោក Lloyd Austin បានចាត់ទុកការសម្លាប់រង្កាលនេះថាជា ការទទួល​ខុស​ត្រូវ​ខាង​សីលធម៌ សម្រាប់អ៊ីស្រាអែលដើម្បីការពារជនស៊ីវិល។ 

សុន្ទរកថារបស់មន្ត្រីជាន់ខ្ពស់អាមេរិកកាលពីថ្ងៃសៅរ៍បានពង្រីកសម្ពាធពីទីក្រុងវ៉ាស៊ីនតោន លើអ៊ី​ស្រាអែល​ឱ្យ​ប្រើការប្រុងប្រយ័ត្នបន្ថែមទៀត ខណៈផ្លាស់​ប្តូរ​ការ​ផ្តោត​លើ​ការ​វាយ​លុក​ដោយ​យោ​ធា​របស់​ខ្លួនបន្ថែមទៀតនៅភាគខាងត្បូងនៅក្នុងតំបន់ហ្កាហ្សាស្ទ្រីបដែលបានឡោមព័ទ្ធ។

ស្រប​ពេលការប្រយុទ្ធគ្នាជាថ្មីបានអូសបន្លាយដល់ថ្ងៃទី ៣ ប្រជាពលរដ្ឋ​ព្រួយ​បារម្ភ​ថា​ការ​វាយ​ប្រហារ តាមអាកាស និងកាំភ្លើងធំ គឺការចាប់ផ្តើម នៃ​ប្រតិបត្តិការ​ជើង​គោក​របស់​អ៊ីស្រាអែល​នៅ​តំបន់​ភាគ​ខាងត្បូង ដែលនឹងធ្វើឱ្យពួកគេ ត្រូវគេចចូលទៅក្នុងតំបន់រួមតូច ហើយអាច​ព្យាយាម​រុញ​ច្រាន​ពួកគេឆ្លងចូលទៅក្នុងប្រទេសអេហ្ស៊ីប៕ អត្ថបទ៖ សុខមាន