រដ្ឋលេខាធិការក្រសួងសាធារណការ និងដឹកជញ្ជូន ឯកឧត្តម ពៅ ម៉ាលី បានលើកឡើងថា កំណើន នៃ​ការប្រើប្រាស់​យានយន្ត​អគ្គិសនី​នៅ​កម្ពុជា​នា​ពេល​បច្ចុប្បន្ន​នេះ​មាន​ការ​កើន​ឡើង​គួរ​ឱ្យ​កត់​សម្គាល់ ខណៈនៅថ្ងៃទី២ ខែធ្នូនេះ កម្ពុជាតាមរយៈក្រុមហ៊ុនហេងហ៊ុយអូតូខា បានបើក​សម្ពោធ​ជា​ផ្លូវ​ការហាងលក់យានយន្តអគ្គិសនី ម៉ាក AION Plus ដែលកំពុង​ពេញ​និយម​នៅ​ប្រទេស​ចិន​នោះ។

ឯកឧត្តម ពៅ ម៉ាលី ថ្លែងនៅក្នុងឱកាសនោះថា ដោយកត្តាកម្ពុជាមានសុខសន្តិភាព និង ការ​អភិវឌ្ឍ​ជា​បន្តបន្ទាប់ បានធ្វើឲ្យអ្នកវិនិយោគទាំងក្នុងស្រុក និងក្រៅ​ស្រុក​មាន​ទំនុក​ចិត្ត​រហូត​បង្កើនការ វិនិយោគរបស់ខ្លួននៅកម្ពុជាបន្ថែម ដូច្នេះ​ការ​ដាក់​សម្ពោធ​ហាង​លក់​យាន​យន្ត​អគ្គិសនី​នៅ​ថ្ងៃ​នេះ នឹងជួយជំរុញឱ្យប្រជាជនកម្ពុជាទាំងអស់គ្នាកាន់តែយល់ដឹង និងយក​ចិត្ត​ទុក​ដាក់​បន្ថែម​ទៀត ក្នុងការចូលរួមអភិវឌ្ឍ និងលើកកម្ពស់ការប្រើប្រាស់យានយន្តអគ្គិសនីនៅកម្ពុជា។

ឯកឧត្តម​លើកឡើងថា ការចូលរួម​ពី​វិស័យ​ឯកជន​ជាមួយ​រាជ​រដ្ឋាភិបាល​ពិត​ជា​មាន​សារៈ​សំខាន់​ខ្លាំង​ណាស់​ដែលមិនអាចខ្វះបានក្នុងការជំរុញវិស័យយានយន្តអគ្គិសនីនៅកម្ពុជា ខណៈកំណើន​នៃ​ការ​ប្រើប្រាស់​យាន​យន្ត​អគ្គិសនី​នៅក​ម្ពុជា​នា​ពេល​បច្ចុប្បន្ន​មាន​ការ​កើន​ឡើង​គួ​រ​ឱ្យ​កត់​សម្គាល់។ កំណើនដ៏ឆាប់រហ័សនេះ ក៏ដោយ​សារ​ប្រជាពលរដ្ឋ​មាន​ការ​យល់​ដឹង​ពី​គុណ​ប្រយោជន៍​នៃ​ការ​ប្រើប្រាស់​យាន​យន្ត​អគ្គិសនី និង​ផ្ដល់​ផល​ចំណេញ​ច្រើន​បើ​ធៀប​ជា​មួយកា​រ​ប្រើប្រា​ស់​យាន​យន្ត​ប្រើប្រា​ស់ប្រេ​ងសាំង ឬម៉ាស៊ូត។

លោក ម៉េង ហេង អគ្គនាយករបស់ក្រុមហ៊ុន AION Cambodia បានឲ្យដឹងថា រថយន្តអគ្គិសនី AION Y Plus ប្រាកដជាអាចវាយលុកទីផ្សារប្រទេសកម្ពុជាបានជាក់ជាមិនខាន ពីព្រោះ​រថយន្ត​អគ្គិសនី​ប្រភេទ SUV មួយនេះមានទំហំធំទូលាយ និងសន្សំសំ​ចៃ​ខ្ពស់​បើធៀប​ទៅ​នឹង​រថយន្ត​ប្រើ​ប្រេងឥន្ធនៈប្រមាណជាជិត ៥ ដងបើគិតទៅលើរថយន្តដែលមានកម្លាំងសេះស្មើរគ្នា៕ អត្ថបទ​៖ បាន ចក់