រដ្ឋមន្ត្រីក្រសួងមហាផ្ទៃប្រទេសបារាំង លោក ហ្គឺរ៉ាល់ ដាម៉ានីន(Gerald Darmanin) បាន​និយាយ​កាល​ពីថ្ងៃសៅរ៍ថា មនុស្សម្នាក់បានស្លាប់ និងពីរនាក់ទៀតបានរងរបួស បន្ទាប់ពី​បុរស​ម្នាក់​បាន​វាយ​ប្រហារអ្នកទេសចរនៅកណ្តាលទីក្រុងប៉ារីស ក្បែ រប៉ម ទួ អាហ្វែល (Eiffel) ។

លោក Darmanin បានប្រាប់អ្នកសារព័ត៌មានថា នគរបាលបានចាប់ខ្លួនបុរសវ័យ២៦ ឆ្នាំ ជា​ជន​ជាតិ​បារាំង ដោយប្រើអាវុធម៉ាក Taser Stun ។

រដ្ឋមន្ត្រីមហាផ្ទៃរូបនេះ បានបន្ថែមថា ជនសង្ស័យ​ធ្លាប់​ត្រូវ​បាន​កាត់​ទោស​ឱ្យ​ជាប់​ពន្ធនាគារ​រយៈពេល ៤ឆ្នាំកាលពីឆ្នាំ២០១៦ ម្ដងរួចមកហើយ ពីបទរៀបចំផែន​ការ​វាយ​ប្រហារ​មួយ​ផ្សេង​ទៀត ​និងស្ថិតក្នុងបញ្ជីឃ្លាំមើលរបស់សេវាសន្តិសុខបារាំង ហើយ​ត្រូវ​បាន​គេស្គា​ល់​ផង​ដែរ​ថា​បុរស​រូប​នេះ​មានជំងឺផ្លូវចិត្ត។ 

ការវាយប្រហារនេះបានកើតឡើងនៅប្រហែលម៉ោង ១៩ និង០០ នាទី ម៉ោងសកល (1900 GMT) នៅពេលបុរសនោះបានវាយប្រហារអ្នកទេសច២នាក់ដោយកាំបិតនៅលើវិថី ខ្វៃឌឺគ្រី​នេល( Quai de Grenelle) ចម្ងាយប៉ុន្មានហ្វីតពីប៉ម ទួអាហ្វែល ធ្វើឱ្យ​ជនជាតិ​អាល្លឺម៉ង់​ម្នាក់​រង​របួស​ធ្ងន់​។ បន្ទាប់មកជនល្មើសត្រូវបាននគរបាលដេញតាម និងបាន​វាយ​ប្រហារ​មនុស្ស​ពីរ​នាក់​ទៀត​ដោយ​ញញួរ មុនពេលត្រូវបានចាប់ខ្លួន។ 

លោក Darmanin បាននិយាយថា ជនសង្ស័យបានស្រែកថា "Allahu Akbar" (ព្រះជាម្ចាស់​ដ៏​អស្ចារ្យ​បំផុត) ហើយបានប្រាប់នគរបាលថា រូបគេខកចិត្តដោយសារតែ ប្រជាជន​ម៉ូស្លីម​ជា​ច្រើន​កំពុង​ស្លាប់​នៅក្នុងប្រទេសអាហ្វហ្គានីស្ថាន និងនៅប៉ាឡេស្ទីន ហើយក៏ខក​ចិត្ត​ផង​ដែរ​ចំពោះ​ស្ថានភាព​សង្គ្រាមនៅតំបន់ហ្កាហ្សា៕ អត្ថបទ៖ សុខមាន