យោងតាមក្រុមអាជ្ញាធរក្នុងតំបន់ នៅថ្ងៃអាទិត្យនេះ មនុស្សម្នាក់បានស្លាប់ និងពីរនាក់​ផ្សេង​ទៀត​បាន​រងរបួស បន្ទាប់ពីគ្រោះរញ្ជួយដីកម្រិត ៧,៤ រ៉ិចទ័រ បានវាយប្រហារខេត្ត ស៊ូរីហ្គាវ ឌេលសួរ ( Surigao del Sur) ភាគខាងត្បូង ប្រទេសហ្វីលីពីន កាលពីយប់ថ្ងៃសៅរ៍។

ការិយាល័យ​កាត់បន្ថយគ្រោះមហន្តរាយក្នុងតំបន់បានរាយការណ៍ថាស្ត្រីម្នាក់មកពីទីក្រុងតាហ្គាំ         ( Tagum) ក្នុងខេត្ត ដាវ៉ាវ ដេល ណូតេ (Davao del Norte) បានស្លាប់ នៅពេ​ល​ដែល​ជញ្ជាំង​ផ្ទះរ​បស់គាត់បានដួលរលំ។ ប្តីនិងកូនរបស់គាត់បានរងរបួស។

វិទ្យាស្ថា​ន​សិក្សាពីបន្ទុះភ្នំភ្លើង និងរញ្ជួយដីហ្វីលីពីន​បាន​ចេញ​ការ​ព្រមាន​អំពី​រលក​យក្ស​ស៊ូណាមិ​កាល​ពីយ​ប់ថ្ងៃសៅរ៍ ដោយជំរុញ​ឱ្យប្រ​ជាជន​ដែល​រស់​នៅ​ក្នុង​តំបន់​ឆ្នេរ​ជិត​ចំណុច​កណ្តាល​នៃ​ការ​ជម្លៀស​ខ្លួន​ទៅកាន់ទីទួលខ្ពស់ ឬផ្លាស់ទីទៅឆ្ងាយក្នុងដីគោក។ យ៉ាងណា ក្រុមអ្នក​ស្រុក​បាន​ត្រឡប់​ទៅ​ផ្ទះ​សម្បែងពួកគេវិញ បន្ទាប់ពីវិទ្យាស្ថាន នេះ បានដកការជូន​ដំណឹង​អំពី​រលក​យក្ស​ស៊ូណាមិ​។

ទីភ្នាក់ងារ​ឧតុនិយមរបស់ប្រទេស​ជប៉ុន​ក៏​បាន​ដក​សេចក្តីជូន​ដំណឹង​អំពី​រលក​យក្សស៊ូណាមិ​សម្រាប់​តំបន់​ឆ្នេរប៉ាស៊ីហ្វិករបស់ប្រទេសនេះផងដែរ បន្ទាប់ពីមានការ​រញ្ជួយ​ដី​ដ៏​ខ្លាំង​កាល​ពី​ថ្ងៃ​សៅរ៍​នៅ​ប្រទេសហ្វីលីពីននោះ៕