ភ្នំពេញ៖ សមាគមមូលនិធិទ្រទ្រង់ការអភិវឌ្ឍនៅកម្ពុជា និង Rotary នៅថ្ងៃទី២ និងទី៣ ខែធ្នូ ឆ្នាំ២០២៣នេះ បានរៀបចំកម្មវិធីពិនិត្យ និងព្យាបាលជំងឺដោយឥតគិតថ្លៃ ជូនដល់​ប្រជាពលរដ្ឋ​ប្រមាណ​ជាង​ ៥ពាន់នាក់ នៅឃុំសណ្ដែក ស្រុកបាធាយ ខេត្តកំពង់ចាម ក្នុងគោល​បំណង​ជួយ​លើក​កម្ពស់​សុខុមាលភាពសាធារណៈរបស់ប្រជាពលរដ្ឋកម្ពុជា។

កម្មវីធីនេះ មានការចូលរួមពីលោកជំទាវ ខាង ឡេង រដ្ឋលេខាធិការក្រសួងពាណិជ្ជកម្ម និង​​ជា​ប្រធាន​ទទួលបន្ទុកក្តាប់រួមនៃក្រុមការងារចុះមូលដ្ឋានឃុំសណ្កែក ស្រុកបាយធាយ ខេត្ត​កំពង់ចាម​, ឯកឧត្តម ឈាន លាង រដ្ឋលេខាធិការក្រសួងព័ត៌មាន, លោក ហាន កុសល អភិបាលរង​ខេត្ត​កំពង់ចាម សមាជិក សមាជិកា ក្រុមប្រឹក្សាស្រុក ឃុំ ភូមិ និងអាជ្ញាធរដែនដីជាច្រើននាក់ផងដែរ។

អ្នកឧកញ៉ា លី ឃុនថៃ ប្រធានកិត្តិយស សមាគមមូលនិធិទ្រទ្រង់ការអភិវឌ្ឍនៅកម្ពុជា បានមានប្រសាសន៍ថា នេះជាសកម្មភាពសប្បុរសធម៌មួយ ក្នុងចំណោមសកម្មភាពជាច្រើនផ្សេងទៀតរបស់សមាគមដែលបានចូលរួមក្នុងសង្គម ហើយ​សមាគម​សូម​ប្តេជ្ញាបន្តការខិតខំប្រឹងប្រែងកៀងគរសប្បុរជននានា ដើម្បី​រៀបចំ​កម្ម​វិ​ធីល្អ​ៗ​បែ​ប​នេះ​បន្ថែម​ទៀតនៅពេលអនាគត ស្របតាមគោលនយោបាយរាជរដ្ឋាភិបាលកម្ពុជា និង​ជា​ពិសេស​ដើម្បី​សម្រេ​ចគោលដៅនៃសមាគមក្នុងការជំរុញការអភិវឌ្ឍធនធានមនុស្ស និងលើក​កម្ពស់​ជីវភាពប្រ​ជាជនកម្ពុជា។

លោកស្រី DG Stela ប្រធាន Rotary បានបង្ហាញអារម្មណ៍រំភើបសប្បាយរីករាយ នៅពេល​បាន​បំពេញ​ការងារ​សប្បុរសធម៌នេះនៅកម្ពុជា និងបានបញ្ជាក់ថា កម្មវិធីនេះ​មាន​ការ​ចូល​រួម​ពី​ក្រុម​គ្រូពេ​ទ្យ​ស័្មគ្រចិត្តមកពីប្រទេសអូស្រ្តាលី ជប៉ុន កូរ៉េ និងក្រុងតៃប៉ិ ប្រទេសចិនចំនួនសរុប ១៦៨​នាក់ ដើម្បីធ្វើការពិនិត្យ និងព្យាបាលជំងឺដោយឥតគិតថ្លៃ​ជូន​ដល់​ប្រជាពលរដ្ឋ​ជាង​ ៥ពាន់នាក់ នៅឃុំ​សណ្ដែកនេះ ក្នុងន័យសប្បុរសធម៌ និង​លើក​កម្ពស់​សុខុមាល​ភាព​សាធារណៈ​ជូន​ដល់​ប្រជាពលរដ្ឋ​ដោយ​ស្មើភាពគ្នា និងមិនមានការរើសអើង។ លោកស្រី បានបន្តថា ក្រៅពីការងារនេះ ក្រុមការងារ ក៏បាននាំយកសម្ភារៈសិក្សាជាកាតាបស្ពាយ ផ្ដល់ជូនសិស្សានុសិស្សចំនួន ១,២០០​នាក់​នៅទីនេះផងដែរ។

នៅក្នុងពិធីនេះ លោកជំទាវ ខាង ឡេង ប្រធានទទួលបន្ទុកក្តាប់រួមនៃក្រុមការងារចុះ​មូល​ដ្ឋានឃុំសណ្កែក ស្រុកបាធាន ខេត្តកំពង់ចាម បានថ្លែងអំណរគុណដល់សមាគម និង Rotary បណ្តាស​ប្បុរសជន និងជាពិសេសក្រុមគ្រូពេទ្យវេជ្ជសាស្រ្ត រួមទាំងក្រុមការងារក្នុង និងក្រៅប្រទេសទាំងអស់ ដែលបានផ្តួច​ផ្តើម​ឲ្យ​មាន​ការ​រៀបចំ​វេទិកា​ទ្រទ្រង់​សប្បុរសដ៏​មាន​សារៈ​សំខា​ន់នេះ​ឡើង ក្នុងន័យជំរុញការលើកកម្ពស់សុខុមាលភាពសាធារណៈរបស់ប្រជាជន។

លោក​ជំទាវ បានបន្ថែមទៀតថា ការផ្តួចផ្តើមនេះ ពិតជាមានសារៈសំខាន់ណាស់ ដោយបា​ន​ផ្តល់​ឱកាសដ៏កម្រជូនដល់ប្រជាពលរដ្ឋក្នុងឃុំសណ្កែករបស់យើង ជាពិសេស​អ្នក​ដែល​មិន​សូវ​មាន​ជីវភាព​ធូរ​ធាអា​ចមានលទ្ធភាពទទួលបានការពិនិត្យ និងព្យាបាលជំងឺដោយឥតគិតថ្លៃ ផ្តល់​ជូ​ន​ដោយ​ក្រុមគ្រូពេទ្យវេជ្ជសាស្រ្តដែលមានវិជ្ជាជីវៈ និងមានបទពិសោធន៍ជាច្រើនឆ្នាំ ដែល​នេះ​ជាការរួមចំណែកដល់ការសម្រាលបន្ទុកជីវភាពប្រជាពលរដ្ឋនៅក្នុងឃុំបានមួយចំណែកផងដែរ។

សូមជម្រាបជូនថា សមាគមមូលនិធិទ្រទ្រង់ការអភិវឌ្ឍនៅកម្ពុជា បានបង្កើតឡើងនៅក្នុងឆ្នាំ២០១៨ ដោយមានគោលបំណងសំខាន់ៗ ផ្ដោត​លើ​ការ​លើក​កម្ពស់​ជីវភាព​ សុខុមាលភាពប្រជាជន ផ្ដើមចេញពីការចូលរួមបណ្ដុះបណ្ដាលធនធានមនុស្ស និង​ជា​ពិសេស​រួម​ចំណែកជាមួយរាជរដ្ឋាភិបាលកម្ពុជា ក្នុងការអភិវឌ្ឍសេដ្ឋ​កិច្ច​ជាតិ​ឲ្យកា​ន់​តែ​រី​ក​ចម្រើន​ជា​លំដាប់​៕