ចំណាប់ថ្នូរអ៊ីស្រាអែលម្នាក់ដែលត្រូវបានដោះលែងកាលពីសប្តាហ៍មុនដោយក្រុមហាម៉ាសនៅតំបន់ហ្កាហ្សា បានបង្ហាញខ្លួននៅលើឆាកនៅឯការប្រមូលផ្តុំគ្នាមួយនៅទីក្រុង Tel Aviv ប្រទេស​អ៊ីស្រាអែ​ល​កាលពីថ្ងៃសៅរ៍ ថ្ងៃទី ២ ខែធ្នូ បានអំពាវនាវ​ឱ្យ​មាន​ការដោះ​លែង​អ្នក​ជាប់​ឃុំ​ដែល​នៅ​សេស​សល់​ជាបន្ទាន់។

មនុស្សរាប់ម៉ឺននាក់បានប្រមូលផ្តុំគ្នានៅឯការជួបជុំមួយក្នុងទីក្រុង Tel Aviv នៅខាងក្រៅ​ទីស្នាក់​ការ​ការពារជាតិរបស់អ៊ីស្រាអែល ជាទីដែលពួកគេបានអបអរសាទរអ្នកស្រី យេឡេណា ទ្រូប៉ា​ណាវ (Yelena Trupanov )វ័យ៥០ ឆ្នាំ ដែលបានឈរនៅលើឆាកត្រឹមតែពីរថ្ងៃ បន្ទាប់​ពី​ត្រូវ​បាន​ដោះលែង​ដោយក្រុមហាម៉ាស។

អ្នកស្រីបាននិយាយផង ស្រែកផង ថា អ្នកស្រីមកអរគុណអ្នក ព្រោះបើគ្មានអ្នក ខ្ញុំនឹងមិន​អាច​មក​ឈរ​នៅ​ទីនេះទេ។ ឥឡូវនេះ យើងត្រូវតែនាំ កូនប្រុសរបស់អ្នកស្រីឈ្មោះ Sasha និងអ្នក​ទាំង​អស់​គ្នា​មក​ផ្ទះវិញ។

ការអង្វរស្រដៀងគ្នាពីចំណាប់ខ្មាំងដែលត្រូវបានដោះលែងផ្សេងទៀតត្រូវបានបង្ហាញនៅលើវីដេអូមុន​ពេលហ្វូងមនុស្សលើកភ្លើងពិលទូរស័ព្ទដៃរបស់ពួកគេឡើងលើ ហើយច្រៀងចម្រៀងជាតិ។

បទ​ឈប់បាញ់រយៈពេល៧ថ្ងៃ ក្នុងអំឡុងក្រុមហាម៉ាស បានដោះលែងចំណាប់ថ្នូរជាង ១០០ នាក់​បាន​ផុតកំណត់កាលពីថ្ងៃសុក្រ ទី ១ ខែធ្នូ។

យោងតាម​ក្រុមអាជ្ញាធរក្នុងតំបន់ ជនជាតិអ៊ីស្រាអែល និងជនបរទេស ជាង ២៤០ នាក់ ត្រូវបាន​ក្រុម​ហាម៉ាស ចាប់នាំចូលទៅតំបន់ហ្កាហ្សា កាលពីថ្ងៃទី ៧ ខែតុលា អំឡុងវាយ​ប្រហារ​ឆ្លង​ព្រំដែន​សម្លាប់​ពលរដ្ឋអ៊ីស្រាអែលប្រមាណ១.២០០នាក់ ៕