រដ្ឋមន្រ្ដីក្រសួងមហាផ្ទៃបារាំងលោក ហ្សេរ៉ាល់ ដាម៉ាណាំង (Gerald Darmanin) បាន​ប្រាប់​ប្រព័ន្ធ​ផ្សព្វផ្សាយ កាលពីថ្ងៃសៅរ៍ថា មនុស្សម្នាក់ ត្រូវបានសំលាប់ និងពីរនាក់ទៀតរងរបួស បន្ទាប់​ពីបុរសជាជនសង្ស័យម្នាក់ដែលធ្លាប់មានទោសពីមុន បានវាយ​ប្រហារ​អ្នក​ទេសចរ​នៅ​កណ្ដាល​ក្រុងប៉ារីស ជិតប៉មទួអេហ្វែល​(Eiffel Tower)។

លោកដាម៉ាណាំង បាននិយាយថា ជនសង្ស័យ ត្រូវបានតុលាការកាត់​ទោស​ឲ្យ​ជាប់​ពន្ធនាគារ ៤ឆ្នាំ​ក្នុង​២០១៦ ពីបទរៀបផែនការវាយប្រហារ ហើយត្រូវគេដឹងថា មានសតិមិន​ល្អផ​ង​ដែរ។ ជន​សង្ស័យ​បាន​ប្រាប់សមត្ថកិច្ចថារូបគេ មានការតូចចិត្ដ ព្រោះជនមូស្លីមជាច្រើននាក់ បានស្លាប់​ក្នុង​ប្រទេស​អាហ្វហ្កានីស្ថាននិងដែនដីប៉ាឡេស្ទីន ហើយក៏ពិបាក​ចិត្ដ​អំពី​ស្ថានការណ៍​នៅ​ក្នុង​តំបន់​ហ្កហ្សា​ផងដែរ។

ការវាយប្រហារ បានកើតឡើងនៅម៉ោងប្រមាណជា ១៩:០០នាទី នៅពេលដែលបុរសម្នាក់ បាន​វាយ​ប្រហារ​ប្ដីប្រពន្ធជាអ្នកទេសចរ ដោយកូនកាំបិតនៅផ្លូវ កេ ដឺ ហ្គ្រេណែល(Quai de Grenelle) មានចម្ងាយតែប៉ុន្មានហ្វីតប៉ុណ្ណោះពីប៉មទួអេហ្វែល បណ្ដាលឲ្យ​ជន​ជាតិ​អាល្លឺម៉ង់​ម្នាក់​ស្លាប់​ដោយ​មុខរបួសធ្ងន់ធ្ង។ ជនសង្ស័យពេលនោះត្រូវបានសមត្ថកិច្ចដេញតាមចាប់ ប៉ុន្ដែជន​សង្ស័យ​វាយ​ប្រហារមនុស្សពីរនាក់ទៀតជាមួយដោយប្រើញញួរ មុនពេលត្រូវ​សមត្ថកិច្ច​ចាប់​ខ្លួន​បាន​។ការិយាល័យរដ្ឋអាជ្ញាប្រឆាំងភេរវកម្ម បាននិយាយថា រឿងក្ដីនេះ កំពុងស្ថិតក្រោមការស៊ើបអង្កេតនៅឡើយ៕ អត្ថបទ មករា