មន្ត្រីក្នុងតំបន់បាននិយាយថា ទឹកជំនន់ធ្ងន់ធ្ងរ និងបំណាក់ដីបានសម្លាប់មនុស្សយ៉ាងហោច​ណាស់ ៤៧នាក់ និង៨៥នាក់ ផ្សេងទៀត រងរបួស នៅភាគខាងជើងប្រទេសតង់ហ្សានី។

គ្រោះថ្នាក់នេះបានកើតឡើងនៅជិតជម្រាលភ្នំ ហាណាង(Hanang) ដែល​នៅ​ពេល​នេះលោក​ស្រី​ប្រធានាធិបតី សាម៉ាលីយ៉ា ហានសាន (Samia Hassan) បានដាក់​ពង្រាយ​កង​កម្លាំង​សន្តិសុខជាតិ ដើម្បី​ជួយដល់កិច្ចខិតខំប្រឹងប្រែងជួយសង្គ្រោះ។

ផ្ទុះសម្បែង​ប្រជាពលរដ្ឋ និងហេដ្ឋារចនាសម្ព័ន្ធ ក៏ត្រូវបាន​រងការ​បំផ្លិច​បំផ្លាញ​ដោយ​សារ​គ្រោះ​​មហន្តរាយ​អាកាសធាតុនេះ ផងដែរ។

គេបាននិយាយថា ទឹកជំនន់នេះ គឺជាគ្រោះថ្នាក់ធម្មជាតិដ៏ធំបំផុតនៅក្នុងប្រទេសតង់ហ្សានី ដែល​ប៉ះ​ពាល់ដល់មនុស្សរាប់ម៉ឺននាក់ក្នុងមួយឆ្នាំៗ។

ប្រទេស​ស្ថិតក្នុងតំបន់អាហ្រ្វិកខាងកើតមួយនេះ បានរងការវាយ​ប្រហារ​យ៉ាង​ធ្ងន់ធ្ងរ​ដោយ​ទឹក​ជំនន់ និងបំណាក់ដីក្នុងឆ្នាំ២០២៣នេះ ដែលមួយផ្នែកបណ្តាលមកពីបាតុភូតអាកាសធាតុ អេលនីញ៉ូ (El Niño)។  

កាល​ពីខែមុននៅប្រទេសតង់ហ្សានី ទទួលរងភ្លៀងធ្លាក់ខ្លាំងជាងធម្មតា ដែលបាន​បណ្តាល​ឲ្យ​មាន​មនុស្សស្លាប់ និងការបំផ្លិចបំផ្លាញទ្រព្យសម្បត្តិនៅក្នុងរដ្ឋធានី ដា អ៊ីសសាឡាម (Dar es Salaam) និងតំបន់នានាដូចជាតំបន់ គីហ្គូម៉ា (Kigoma)តំបន់ កាហ្គេរ៉ា(Kagera)តំបន់ ហ្គេតា (Geita) និង តំបន់កោះ អ៊ុនហ្គូចា (Unguja)។

ទីភ្នាក់ងារឧតុនិយមរបស់ប្រទេសតង់ហ្សានីបានព្រមានថាភ្លៀងនឹងបន្តនៅក្នុងខែនេះ។

បាតុភូត El Nino គឺជាគំរូអាកាសធាតុដែលកើតឡើងដោយឯកឯង ដែលមាន​ប្រភព​នៅ​មហា​សមុទ្រ​ប៉ាស៊ីហ្វិក ដែលជំរុញឱ្យមានសីតុណ្ហភាពកើនឡើងនៅទូទាំងពិភពលោក។ បាតុភូតនេះ អាចនាំមកនូវគ្រោះរាំងស្ងួតដល់តំបន់មួយចំនួន និងភ្លៀងធ្លាក់ខ្លាំង នៅប្រទេសផ្សេងទៀត៕ អត្ថបទ៖ សុខមាន