យោធាអ៊ីស្រាអែលបាននិយាយថា កងកម្លាំងថ្មើរជើងរបស់​ខ្លួន​កំពុង​ធ្វើ​ប្រតិបត្តិការ​នៅ​ពាសពេញ​ តំបន់ហ្កាហ្សាស្ទ្រីប ស្របពេលកងកម្លាំងអ៊ីស្រាអែល បាន​ទម្លាក់​គ្រាប់​បែក​លើ​តំបន់​ឡោមព័ទ្ធ​មួយ​នេះ កាលពីថ្ងៃអាទិត្យ ទី ៣ ខែធ្នូ ដោយបានបណ្ដាលឲ្យពលរដ្ឋប៉ាឡេស្ទីនជាច្រើនស្លាប់ និង​របួស​ ខណៈ​ជនស៊ីវិល បានស្វែងរកទីជម្រកនៅក្នុងតំបន់ដែលកាន់តែរួមតូច ហ្កាហ្សា នៅ​ភាគ​ខាង​ត្បូង​។

ក្រុមសកម្មប្រយុទ្ធហាម៉ាស បាននិយាយថា យុទ្ធជន​របស់​ខ្លួន​បាន​ប៉ះ​ទង្គិច​ជាមួយ​ទាហាន​អ៊ីស្រាអែល​នៅ​ចម្ងាយប្រហែល២ គីឡូម៉ែត្រ ពីទីក្រុង Khan Younis ភាគខាងត្បូង។

អ្នកស្រុកដែលភាគច្រើនបានផ្លាស់ទៅទីនោះដើម្បីភៀសខ្លួនពីការវាយប្រហារកាលពីកន្លងទៅ ក្នុង​ជម្លោះនេះ បាននិយាយថា ពួកគេអាចឮសំឡេងរថក្រោះ និងមានការភ័យខ្លាចកាន់តែខ្លាំង ចំពោះ​ការវាយលុកថ្មើរជើងថ្មីរបស់អ៊ីស្រាអែល។ 

មុននេះ យោធាអ៊ីស្រាអែល បានបញ្ជាឱ្យប្រជាជនជម្លៀសចេញពីតំបន់មួយចំនួនក្នុង និង​ជិត​ទីក្រុង​នេះ ប៉ុន្តែពុំបានប្រកាសពីការវាយលុកថ្មើរជើងថ្មីនៅភាគខាងត្បូងណាមួយឡើយ។  

អ្នក​នាំពាក្យឧត្តមនាវីទោ ដានីញែលហាហ្គារី (Daniel Hagari) បានប្រាប់​អ្នក​សារព័ត៌មាន​នៅ​ទីក្រុង Tel Aviv ក្នុងសញ្ញាច្បាស់បំផុតថា ការវាយលុកដោយថ្មើរជើង ដែលបាន​គ្រោង​ទុក​របស់​ខ្លួន​នៅ​ភាគ​ខាងត្បូងបានចាប់ផ្តើមហើយ ។

កងកម្លាំងការពារអ៊ីស្រាអែល IDF បន្តពង្រីកប្រតិបត្តិការ​ថ្មើរ​ជើង​របស់​ខ្លួន​លើ​មជ្ឈ​មណ្ឌល​ហាម៉ាស នៅពាសពេញតំបន់ហ្កាហ្សាស្ទ្រីប។ កង​កម្លាំង​កំពុង​ប្រឈម​ជាមួយ​ក្រុម​ភេរវករ​ហើយ​សម្លាប់​ពួក​គេ៕ អត្ថបទ៖ សុខមាន