កងកម្លាំងអ៊ីស្រាអែលបានទម្លាក់គ្រាប់បែកគ្រប់ទីកន្លែងនៃតំបន់ហ្កាហ្សាស្ទ្រីប(Gaza Strip)កាលពីថ្ងៃអាទិត្យទី៣ធ្នូរ។ ជំរំជនភៀសខ្លួន​ចាបាលីយ៉ា (Jabalia) នៅក្នុងតំបន់គ្រប់គ្រងដោយក្រុមហាម៉ាសភាគខាងជើង ស្ថិត​ក្នុងចំណោមទីតាំងជាច្រើនដែលបានរងគ្រោះពីការទម្លាក់គ្រាប់បែករបស់អ៊ីស្រាអែល។ អ្នកនាំ​ពាក្យក្រសួងសុខាភិបាលហ្កាហ្សា និយាយថាមនុស្សមួយចំនួនបានស្លាប់ ដោយសារ​ការ​វាយ​ប្រហារ​តាមអាកាសរបស់អ៊ីស្រាអែល។   

វីដេអូទទួលបានដោយសារព័ត៌មាន Reuters ក្រោយការវាយប្រហារ បង្ហាញពីកុមារជាច្រើន ប្រឡាក់​ដោយធូលីពណ៌ប្រផេះ ខណៈត្រូវបានជួយសង្រ្គោះចេញពីគំរថ្ម នៃអគារ​នានា​ដែល​បាន​បាក់​រលំ។ កុមារ​ជាច្រើនកំពុងស្រែកយំ តាមរកឪពុករបស់ពួកគេ។ម្នាក់ក្នុងចំណោមពួកគេនិយាយថា ឪពុក​គេ​បាន​ស្លាប់ហើយ។ ការវាយ​ប្រហារជាថ្មីបានកើតមានឡើង ក្រោយការផ្អាក​ប្រយុទ្ធគ្នាក្នុ​ង​បទ​ឈប់​បាញ់​រយៈពេល​៧​ថ្ងៃ រវាងកងទ័ពអ៊ីស្រាអែល និងក្រុមហាម៉ាស បានបញ្ចប់កាលពីថ្ងៃសុក្រសប្ដាហ៍មុន។ ប្រជា​ពលរដ្ឋនិយាយថា ការទម្លាក់គ្រាប់បែកពីយន្តហោះសង្គ្រាម និងកាំភ្លើង​ធំ​បាន​ផ្ដោត​លើ​ទីក្រុង​នានា​នៃទីក្រុង Khan Younis និង Rafah។

គេបានលឺ​សំឡេងយំលាន់ត្រហឹងនៅក្បែរសាកសព នៅលើឥដ្ឋក្នុងមន្ទីរពេទ្យ។ ពុំមាន​ការ​អត្ថាធិប្បាយភ្លាមៗ​ពីអ៊ីស្រាអែល​ទេពាក់ព័ន្ធ​នឹង​សកម្មភាព​យោធា​នានា​ដែល​ត្រូវ​បាន​រាយការណ៍។ ក្រសួងសុខាភិបាលហ្កាហ្សាគ្រប់គ្រងដោយក្រុមហាម៉ាស បាននិយាយថា មនុស្ស​ជាង​១៥.៥២០នាក់ បានស្លាប់ក្នុងសង្គ្រាមជិត២ខែមកនេះ៕ អត្ថបទ៖ សុខមាន