បន្ទាប់ពីការទម្លាក់គ្រាប់បែក និងការព្រមានឲ្យជម្លៀសចេញពីតំបន់មួយចំនួន ជនភៀសខ្លួន ហ្កាហ្សា មួយចំនួនបានវេចបង្វេចរបស់របររបស់ពួកគេ ហើយឆ្ពោះទៅកាន់ទីក្រុង រ៉ាហ្វា (Rafah) នៅ​ភាគខាងត្បូងនៃតំបន់ហ្កាហ្សាស្ទ្រីប កាលពីថ្ងៃអាទិត្យ ថ្ងៃទី ៣ ធ្នូ ដើម្បីស្វែងរកទីជម្រកថ្មី។

គេបាន​មើលឃើញក្រុមគ្រួសារជាច្រើនរួមទាំងបង្វេចរបស់របររបស់ពួកគេ នៅលើ​មធ្យោបាយ​ធ្វើ​ដំណើរ​អ្វី​ក៏ដោយ ដែលពួកគេអាចរកបាន ស្របពេលអ្នកផ្សេងទៀតបានប្រើរទេះ ដែល​អូស​ដោយសត្វលា ចាប់ផ្តើមធ្វើដំណើរឆ្ពោះទៅទីក្រុងរ៉ាហ្វា ដើម្បីស្វែងរកទីជម្រក។

គ្រួសារ​ខ្លះបានធ្វើដំណើរដោយថ្មើរជើង ដោយស្ពាយកាបូប និងថង់ផ្លាស្ទិក ជាមួយ​នឹង​សម្ភារ​ចាំបាច់ផ្សេងៗ។ ក្រុមអ្នកស្រុកបាននិយាយថា កងកម្លាំងអ៊ីស្រាអែល បាននិងកំពុងវាយលុកតំបន់ឆ្នេរ ចាប់​តាំង​ពី​ការ​បញ្ចប់​បទឈប់បាញ់ជាមួយក្រុមហាម៉ាស ដោយការទម្លាក់គ្រាប់បែកផ្តោតលើទីក្រុង Khan Younis និងទីក្រុង Rafah នៅភាគខាងត្បូង។

យោធាអ៊ី​ស្រាអែល​បាន​ចេញ​សេចក្តី​ថ្លែង​ការណ៍​មួយដោ​យ​បញ្ជា​ឱ្យ​ប្រជាជន​ប៉ាឡេស្ទីន​ជម្លៀស​ជា​បន្ទាន់​ចេញ​ពី​តំបន់ចំនួន៦កន្លែង នៅក្នុង និងជុំវិញទីក្រុង Khan Younis ។ អ៊ីស្រាអែលបានបង្ហោះផែនទីដែលបង្ហាញពីជម្រកដែលពួកគេគួរតែទៅភាគខាងលិចនៃទីក្រុង Khan Younis និងភាគខាងត្បូងឆ្ពោះទៅទីក្រុង Rafah នៅព្រំដែនជាមួយប្រទេសអេហ្ស៊ីប៕