ថ្លែងក្នុងពិធីអបអរសាទរទិវាជនមានពិការភាពកម្ពុជាលើកទី២៥ និងជនមាន​ពិការភាព​អន្តរជាតិ លើកទី៤១ នៅថ្ងៃទី៤ ខែធ្នូ ឆ្នាំ២០២៣ រដ្ឋមន្ត្រីក្រសួងសង្គមកិច្ច អតីតយុទ្ធជន និង​យុវនីតិសម្បទា ឯកឧត្តម ជា សុមេធី បានឱ្យដឹងថា កន្លងមកមាន​ជន​មាន​ពិការ​ភាព​ជា​ច្រើន​ត្រូវ​បាន​ស្ថាប័ន​ពាក់ព័ន្ធនានាទទួល ឱ្យចូលបម្រើការងារបានជាច្រើនពាន់នាក់។

ឯកឧត្ដមបញ្ជាក់បន្ថែមថា នៅក្នុងឆ្នាំ២០២៣ នេះ មានជនមានពិការភាពជាង ៧០០០ នាក់ ត្រូវបាន ស្ថាប័នរដ្ឋ និងឯកជនទទួលឱ្យចូលបម្រើការងារ។

ឯកឧត្ដមរដ្ឋមន្ត្រីបានរម្លឹកឱ្យដឹងបន្ថែមថា កន្លងមក​នៅ​អំឡុង​ពិភព​លោក​ប្រឈម​ចួប​នឹង​វិបត្តិ​នានា​ រាជរដ្ឋាភិបាលក៏បានបង្កើនការយកចិត្តទុកដាក់ចំពោះជនមានពិការភាពនៅកម្ពុជាផងដែរ ជា​ពិសេស ការផ្ដល់សាច់ប្រាក់ជូនជនមានពិការភាព និងក្រុមគ្រួសារ ដើម្បី​លំនឹង​ជីវភាព​ប្រចាំ​ថ្ងៃ​របស់​ពួកគាត់។

ឆ្នាំ២០២៣ នេះ កម្ពុជាបានប្រារព្ធពិធីអបអរសាទរទិវាជនមានពិការភាពកម្ពុជាលើកទី២៥ និង​ជន​មានពិការភាពអន្តរជាតិលើកទី៤១ ក្រោមប្រធានបទ«ដំណោះស្រាយប្រកបដោយនវានុវត្តន៍ ដើម្បី​សង្គម​មួយមានផាសុកវត្ថុ និងសមធម៌»៕ ដោយ៖ គង់ ឌិន