ក្រុមអាជ្ញាធរបាននិយាយថា បុរសម្នាក់បានប្រើកាំបិតសាច់អាំងសម្លាប់សមាជិក ៤នាក់​នៃ​គ្រួសារ​របស់ខ្លួន រួមទាំងកុមារពីរនាក់ នៅលំនៅឋានមួយក្នុងតំបន់ឃ្វីនស៍ (Queens) នៃទីក្រុងញូវយ៉ក របស់​សហរដ្ឋអាមេរិក កាលពីព្រឹកថ្ងៃអាទិត្យ (០៣ ធ្នូ) មុន​ពេល​ត្រូវ​បាន​បាញ់សម្លាប់ដោយនគរបាល។

នាយកដ្ឋាននគរបាលទីក្រុងញូវយ៉ក បាននិយាយថា ក្មេងស្រីម្នាក់​បាន​ទូរស័ព្ទ​ទៅ​រាយការណ៍​អំពី​ឧបទ្ទវ​ហេតុនេះនៅក្នុងសង្កាត់ ហ្វា រ៉កអឹវ៉េ (Far Rockaway) តំបន់ឃ្វីនស៍។ នគរបាលបានប្រាប់អ្នកយកព័ត៌មានថា ជនសង្ស័យឈ្មោះ ខតនី ហ្គូដន (Courtney Gordon) វ័យ ៣៨ឆ្នាំ បានចាក់មន្ត្រីនគរបាលពីរនាក់ ដែលប្រតិបត្តិការឆ្លើយតបនឹងកន្លែងកើតហេតុ បន្ទាប់​មកមន្ត្រីម្នាក់ក្នុងចំណោមអ្នកទាំងពីរនោះបានបាញ់សម្លាប់ជនដៃដល់រូបនោះ។

នគរបាល​បាននិយាយថា ជនសង្ស័យធ្លាប់ត្រូវបានចាប់ខ្លួនកាលពីមុនពីបទហិង្សាក្នុងគ្រួសារ។ មន្ត្រីនគរបាលរងរបួសទាំងពីរនាក់នោះ ត្រូវបានគេបញ្ជូនទៅកាន់មន្ទីរពេទ្យ ហើយ​រំពឹងថា​នឹ​ង​ជា​សះស្បើ​យ។

នគរបាលបន្ថែមថា មនុស្ស៤នាក់ ដែលត្រូវបានចាក់សម្លាប់នោះរួមមានក្មេងប្រុសអាយុ ១២ឆ្នាំ​ម្នា​ក់ ក្មេងស្រីអាយុ ១១ឆ្នាំម្នាក់ ស្ត្រីអាយុ៤៤ឆ្នាំម្នាក់ និងបុរសអាយុ ៣០ឆ្នាំម្នាក់ ។ ក្មេងស្រីអាយុ ១១ឆ្នាំនោះ ត្រូវបានគេរកឃើញនៅមុខផ្ទះ ចំណែក​បីនាក់​ទៀត​ត្រូវ​បាន​រក​ឃើញ​នៅខាងក្នុង​បន្ទប់​គេង​៕