យោធាចិននៅថ្ងៃចន្ទទី៤ធ្នូនេះ បាននិយាយថា នាវាប្រយុទ្ធរបស់អាមេរិកមួយគ្រឿង បាន​ចូល​ដែន​ទឹក​ដោយខុសច្បាប់ នៅជាប់នឹងតំបន់ថ្មប៉ប្រះទឹក Second Thomas Shoal ដែល​ជា​តំបន់​មាន​ជម្លោះ​នៅក្នុងសមុទ្រចិនខាងត្បូង។ 

អ្នកនាំពាក្យប្រតិបត្តិការនៃទីបញ្ជាការសម្របសម្រួលខាងត្បូងចិនបាននិយាយនៅក្នុងសេចក្តីថ្លែងការណ៍​មួយថា សហរដ្ឋអាមេរិក បានធ្វើឱ្យប៉ះពាល់ដល់សន្តិភាព និងស្ថិរភាព​ក្នុង​តំបន់​យ៉ាង​ធ្ងន់ធ្ងរ។

អ្នកនាំពាក្យរូបនេះក៏បាននិយាយផងដែរថា សហរដ្ឋ​អាមេរិក​មាន​ចេតនា​រំខាន​ដល់​សមុទ្រ​ចិន​ខាង​ត្បូង និងបានបំពានយ៉ាងធ្ងន់ធ្ងរលើអធិបតេយ្យភាពរបស់ចិន។

ប្រទេស​ចិនកំពុងមានជម្លោះជាមួយ​ប្រទេសជិត​ខាង​មួយ​ចំនួ​ន​ជុំវិញ​ការ​អះអាង​សិទ្ធិ​គ្រប់​គ្រង​ដែន​ទឹក​ដ៏​ធំក្នុងសមុទ្រចិនខាងត្បូង។ 

ក្នុងរយៈពេលប៉ុន្មានខែថ្មីៗនេះ ប្រទេសចិន បានប្រឈម ដាក់គ្នាជាច្រើនជាមួយនាវាហ្វីលីពីន ហើយ​ក៏​បានតវ៉ាផងដែរចំពោះនាវាអាមេរិក ដែលកំពុងល្បាតនៅតំបន់ជម្លោះ។

អ្នកនាំ​ពាក្យ​ខាង​លើបាននិយាយថា កងទ័ពរំដោះ​ប្រជាជន​ចិន​បាន​រៀបចំ​កង​ទ័ព​ដែន​សមុទ្រ​ដើម្បី​តាម​ដាន និងត្រួតពិនិត្យនាវាអាមេរិក ហើយថា កងទ័ព​របស់​ខ្លួន​នៅ​ទីបញ្ជាការ​សម្រប​សម្រួល​នេះ មានការប្រុងប្រយ័ត្នខ្ពស់គ្រប់ពេលវេលា ដើម្បីការពារអធិបតេយ្យភាពជាតិយ៉ាងម៉ឺងម៉ាត់៕