មេដឹកនាំកោះតៃវ៉ាន់ លោកស្រី សៃ អ៊ីងវ៉ិន (Tsai Ing-wen) បាន​អំពាវ​នាវ​ដល់​បណ្ដា​អ្នក​បោះឆ្នោ​ត​កាលពីថ្ងៃអាទិត្យ (០៣ ធ្នូ) ឱ្យគិតអំពីអ្វីដែលបានកើតឡើងចំពោះទីក្រុងហុងកុង ដែ​ល​គ្រប់​គ្រងដោយប្រទេសចិន នៅពេលពួកគេធ្វើការបោះឆ្នោតនៅខែក្រោយ ដោយ​និយាយ​ថា​ សន្តិភាព​ត្រូវ​តែគាំទ្រដោយការប្តេជ្ញាចិត្តដើម្បីបង្កើនការការពារ។

លោកស្រី សៃ បាននិយាយថា «ខ្ញុំចង់សួរអ្នកទាំងអស់គ្នានៅទីនេះថា តើមានអ្នក​ណាច​ង់​បាន​សង្រ្គាម​ដែរ​ទេ​? គឺមិនមាននោះទេ។ ក្រឡេកមើលហុងកុង ហើយគិតពីតៃវ៉ាន់វិញ យើងមិ​ន​ចង់​បាន​សន្តិភាព​តាម​បែបហុងកុងនោះទេ យើងចង់បានសន្តិភាពបែបថ្លៃថ្នូរ»។

កោះ​តៃវ៉ាន់​រៀបចំសម្រាប់ការបោះឆ្នោតមេដឹកនាំ និងសភា នៅថ្ងៃទី១៣ ខែមករា ខណៈ​ប្រទេស​ចិន ដែលអះអាងសិទ្ធលើកោះដែលគ្រប់គ្រងតាមបែបប្រជាធិបតេយ្យមួយនេះ បង្កើន​សម្ពាធ​យោធា​ដើម្បី​អះអាងការទាមទាររបស់ខ្លួន រួមទាំងល្បែង​សង្រ្គាម​ធំ​ចំនួន​ពីរ​នៅ​ជុំវិញ​កោះនេះ​កាល​ពី​មួយ​ឆ្នាំកន្លះមុន។

ប្រទេសចិន និងគណបក្សប្រឆាំងដ៏សំខាន់របស់កោះតៃវ៉ាន់ គឺគណបក្សគូមីនតាំង (KMT) បាន​បោះឆ្នោត​ជ្រើសរើសជាជម្រើសរវាងសង្រ្គាម និងសន្តិភាព។ ប្រទេសចិន មិនពេញ​ចិត្ត​គណបក្ស​ប្រជាធិបតេយ្យ​ជឿន​លឿន (DPP) ដែលកំពុងកាន់អំណាចរបស់កោះតៃវ៉ាន់ និងបេក្ខភាព​មេ​ដឹកនាំ​បន្ទាប់​របស់ខ្លួន គឺមេដឹកនាំលំដាប់ទី២ លោក ឡៃ ឈីងតេ (Lai Ching-te) នោះទេ​ដោយ​ហៅពួ​កគេថាជាអ្នកផ្ដាច់ខ្លួនដ៏គ្រោះថ្នាក់។

ទីក្រុងហុងកុង ដែលជាអតីតអាណានិគមរបស់អង់គ្លេស ត្រូវបានត្រលប់​ទៅ​ក្រោម​ការ​គ្រប់​គ្រង​របស់​ចិន​វិញនៅឆ្នាំ១៩៩៧ ជាមួយនឹងការសន្យានៃស្វ័យភាពធំទូលាយក្រោមក្របខណ្ឌ «ប្រទេសមួយ ប្រព័ន្ធពីរ» ដែលចិនក៏បានផ្តល់ជូនកោះតៃវ៉ាន់ផងដែរ ដោយ​មាន​ការ​គាំទ្រ​តិច​តួច​ប៉ុណ្ណោះ​សម្រាប់​កោះ​នេះ៕