ក្រុមសកម្មប្រយុទ្ធរដ្ឋអ៊ីស្លាម បានអះអាងទទួលខុសត្រូវចំពោះការបំផ្ទុះគ្រាប់បែកដ៏បង្ហូរឈាមមួយនៅឯវិហារកាតូលិកក្នុងប្រទេសហ្វីលីពីន កាលពីថ្ងៃអាទិត្យ (០៣ ធ្នូ) ដែលបានសម្លាប់មនុស្សយ៉ាងហោចណាស់ ៤នាក់ និងបណ្ដាលឲ្យមនុស្ស ៥០នាក់ ផ្សេងទៀតរងរបួស។

ការវាយប្រហារនេះត្រូវបានធ្វើឡើងនៅក្នុងកន្លែងហាត់ប្រាណរបស់សាកលវិទ្យាល័យមួយក្នុងទីក្រុងម៉ារ៉ាវី (Marawi) ជាទីក្រុងមួយនៅភាគខាងត្បូងហ្វីលីពីន ដែលត្រូវបានឡោមព័ទ្ធដោយពួកសកម្មប្រយុទ្ធអ៊ីស្លាមអស់រយៈពេលប្រាំខែក្នុងឆ្នាំ២០១៧។ ក្រុមរដ្ឋអ៊ីស្លាម ដែលមានឥទ្ធិពលនៅភាគខាងត្បូងរបស់ប្រទេសបាននិយាយនៅលើបណ្ដាញផ្ញើសារតេឡេក្រាម ថាសមាជិករបស់ខ្លួនបានបំផ្ទុះគ្រាប់បែកនោះ។

កាលពីព្រឹកថ្ងៃអាទិត្យ មុនការអះអាងររបស់ក្រុមរដ្ឋអ៊ីស្លាមនេះ ប្រធានាធិបតីហ្វីលីពីន លោក ហ្វឺឌីណាន ម៉ាកូស ជូនៀ (Ferdinand Marcos Jr) បានថ្កោលទោសចំពោះ «ទង្វើគ្មានន័យ និងសាហាវបំផុតដែលប្រព្រឹត្តដោយភេរវករបរទេស»។ នគរបាល និងយោធាបានពង្រឹងសន្តិសុខនៅភាគខាងត្បូងរបស់ប្រទេស និងជុំវិញរដ្ឋធានីម៉ានីល។

រដ្ឋមន្ត្រីការពារជាតិ លោក ហ្គីលប៊ឺតូ ទីអូដូរ៉ូ (Gilberto Teodoro) បានប្រាប់សន្និសីទសារព័ត៌មានមួយថា ប្រតិបត្តិការអនុវត្តច្បាប់ ដើម្បីកាត់ទោសជនល្មើសនៃ «សកម្មភាពភេរវកម្ម» នឹងបន្តដោយឥតឈប់ឈរ។ លោក Teodoro បាននិយាយថា មាន «ការចង្អុលបង្ហាញដ៏រឹងមាំនៃក្រុមបរទេស» នៅក្នុងការបំផ្ទុះគ្រាប់បែកនេះ ប៉ុន្តែលោកបដិសេធមិនបញ្ជាក់ព័ត៌មានលម្អិត ដើម្បីកុំឱ្យមានការប៉ះពាល់ដល់ការស៊ើបអង្កេតដែលកំពុងបន្ត៕