នៅថ្ងៃចន្ទនេះ ប្រជាពលរដ្ឋរស់នៅក្នុងទីក្រុងញូវដែល្លី បានចែករំលែកស្ថានភាពអាក្រក់ដ៏លំបាករបស់ពួកគេ នៅក្នុងការប្រយុទ្ធប្រឆាំងនឹងខ្យល់កខ្វក់ ស្របពេលដែលខ្យល់គ្មានសុខភាព បន្តកើតមាននៅក្នុងរដ្ឋធានីប្រទេសឥណ្ឌាមួយនេះ ។

 រូបភាពវីដេអូឃ្លីប ឃើញផ្លូវសំខាន់ៗនៅក្នុងទីក្រុងមួយនេះ និងអគារប្រវត្តិសាស្រ្ត គ្របដណ្តប់ដោយផ្សែងអ័ព្ទកខ្វក់ ស្របពេលដែលពពុះពុល ត្រូវបានមើលឃើញអណ្តែតផងដែរនៅក្នុងទន្លេពិសិដ្ឋយ៉ាមូណា ។ 

 លោក Ram Narayan Sharma គឺជាពលរដ្ឋក្នុងស្រុកមួយរូបនិយាយថា ទីក្រុងដែល្លី បានក្លាយជាបន្ទប់ឧស្ម័ន ដោយសារតែគុណភាពខ្យល់កាន់តែធ្ងន់ធ្ងរទៅ នៅក្នុងតំបន់ ។

 រដ្ឋធានីរបស់ប្រទេសឥណ្ឌាមួយនេះ មានតួលេខសន្ទស្សន៍គុណភាពខ្យល់កម្រិត ២៣៨ ធ្វើឲ្យវាស្ថិតក្នុងប្រភេទកម្រិតខ្យល់គ្មានសុខភាពខ្លាំង ។

ទិន្នន័យពី គណៈកម្មាធិការគ្រប់គ្រងខ្យល់កខ្វក់កណ្តាលឥណ្ឌា(CPCB) បង្ហាញពីសន្ទស្សន៍គុណភាពខ្យល់លើសពីកម្រិត ៤០០នៅតាមតំបន់ជាច្រើន នៅក្នុងរដ្ឋធានីរបស់ប្រទេសឥណ្ឌាមួយនេះ ។ គុណភាពខ្យល់កខ្វក់លើសពីកម្រិត ៦០ ត្រូវបានគេចាត់ទុកថាជាខ្យល់គ្មានសុខភាព ។

 គុណភាពខ្យល់នៅក្នុងទីក្រុងញូវដែល្លី កាន់តែធ្ងន់ធ្ងរខ្លាំងជារៀងរាល់ឆ្នាំមុនរដូវរងារ ពេលដែលខ្យល់ត្រជាក់ទាក់ខ្យល់កខ្វក់ពីប្រភពជាច្រើនរូមទាំងរថយន្ត ឧស្សាហកម្ម ធូលីសំណង់ និងការដុតកាកសំណល់កសិកម្ម ៕