រដ្ឋមន្ត្រីការបរទេសអ៊ីរ៉ង់លោក ហ៊ូសេន អាមីរ៉ាប់ឌូឡាហៀន ( Hossein Amir-Abdollahian) និងប្រធានគោលនយោបាយការបរទេសរបស់សហភាពអឺរ៉ុបលោក ចូសិប បូរ៉ែល ( Josep Borrell) បានគូសបញ្ជាក់ពីភាពចាំបាច់ ដើម្បីបញ្ចប់ជម្លោះនៅតំបន់ហ្កាហ្សាស្ទ្រីបឲ្យបានឆាប់ តាមដែលអាចធ្វើទៅបាន។

នៅក្នុងការសន្ទនាតាមទូរស័ព្ទមួយ កាលពីថ្ងៃសៅរ៍ ភាគីទាំងពីរ បានពិភាក្សាអំពីការវិវឌ្ឍចុងក្រោយបំផុត នៅក្នុងតំបន់ហ្កាហ្សា ក៏ដូចជាកិច្ចសហប្រតិបត្តិការរវាងអ៊ីរ៉ង់ និងទីភ្នាក់ងារថាមពលបរមាណូអន្តរជាតិ (IAEA) នេះបើយោងតាមសេចក្តីថ្លែងការណ៍ដែលបានចេញផ្សាយ នៅលើគេហទំព័ររបស់ក្រសួងការបរទេសអ៊ីរ៉ង់ កាលពីថ្ងៃអាទិត្យ។

រដ្ឋមន្ត្រីការបរទេសអ៊ីរ៉ង់ បានសង្កត់ធ្ងន់លើតម្រូវការដើម្បីបញ្ឈប់ «ឧក្រិដ្ឋកម្ម» របស់អ៊ីស្រាអែលប្រឆាំងនឹងប៉ាឡេស្ទីន ដោយលើកឡើងថា វាចាំបាច់ក្នុងការបញ្ចប់ការវាយប្រហារដោយយោធារបស់អ៊ីស្រាអែលភ្លាមៗប្រឆាំងនឹងប្រជាជននៅតំបន់ហ្កាហ្សា និងរៀបចំទីកន្លែងសម្រាប់ការផ្តល់ជំនួយមនុស្សធម៌បន្ថែមទៀតដល់តំបន់ឆ្នេរនេះ។

លោក បានព្រមានអំពី «ផែនការ» របស់អ៊ីស្រាអែល និងផ្លាស់ទីដោយបង្ខំប្រជាជនប៉ាឡេស្ទីនចេញពីទឹកដីរបស់ពួកគេ និងការពង្រីកជម្លោះ នៅក្នុងតំបន់ ប្រសិនបើការវាយប្រហាររបស់អ៊ីស្រាអែល មិនត្រូវបានបញ្ឈប់ទេ។