​បាល់ទាត់៖ ​ខ្សែប្រយុទ្ធ​ជួរមុខ​ទាំងពីរ Karim Benzema និង Antoine Griezmann ​សុទ្ធតែ​ត្រៀមខ្លួន​រួចរាល់​សំរាប់​ការប្រកួត​រាត្រី​នេះ​ ជួប​ជាមួយ​ក្រុម​ម្ចាស់ផ្ទះ​អាល្លឺម៉ង់​នៅ​ទីក្រុង Munich នៅ​ក្នុង​ពូ​ល F ដែល​ជា​ពូ​ល​ចុងក្រោយ​គេ​មិនទាន់​ប្រកួត​។

​កីឡាករ​ទាំងពីរ​នាក់សុទ្ធតែ​ទទួលរង​របួស ​ក្នុង​ការ​ប្រកួត​មិត្តភាព​ចុងក្រោយ​ឲ្យ​ក្រុម​បារាំង​យកឈ្នះ​ប៊ុល​ហ្ការី កាលពី​ថ្ងៃ​អង្គារ​សប្ដាហ៍​មុន​ដោយ Benzema មាន​របួស​ជើង និង Griezmann មាន​របួស​កំភួនជើង​។ ​យ៉ាង​ណាក្តី​កីឡាករ​ទាំងពីរ​ហ្វី​ត ១០០% វិញ​ហើយ​ និង​អាច​ចូល​លេង​បានការ​ប្រកួត​រាត្រី​នេះ​។​ ​បារាំង និង​អាល្លឺម៉ង់​នឹង​ជួបគ្នា​លើក​ទី ៦ ក្នុង​ព្រឹត្តិការណ៍​បាល់ទាត់​ធំៗ ខណៈ​ជំនួប ៥លើក​កន្លងមក​នោះ​ឈ្នះ ២ដូចគ្នា និង​ស្មើ​មួយ​។​

​​បារាំង​ចុងក្រោយ​បំផុត​យកឈ្នះ​អាល្លឺម៉ង់​នៅ Euro ២០១៦ លទ្ធផល ២-០ នៅ​វគ្គ​ពាក់​កណ្ដាល​ផ្ដាច់ព្រ័ត្រ​ដោយ​ ២​គ្រាប់​របស់ Antoine Griezmann​។​ ​ដោយឡែក​សំរាប់​ក្រុម​អាល្លឺម៉ង់​នឹង​អវត្តមាន​ខ្សែបម្រើ Leon Goretzka ខណៈ Ilkay Gundogan និង Toni Kroose ជា​ដៃគូ​នឹង​គ្នា​នៅ​តំបន់​កណ្ដាល​ពេល​អាល្លឺម៉ង់​យកឈ្នះ​ឡេ​តូ​នី ៧-០ ក្នុង​ជំនួប​មិត្តភាព​ចុងក្រោយ​៕

​អត្ថបទ​៖​នាង សុភា​វុ​ធ