ប្រមុខអង្គការសុខភាពពិភពលោក(WHO) លោក Tedros Adhanom Ghebreyesus បាន​និយាយ​កាល​ពីថ្ងៃចន្ទ ទី៤ធ្នូ ថា កងទ័ពអ៊ីស្រា​អែល​បាន​ប្រាប់​ទីភ្នាក់​ងារ​សុខភាព​របស់​អង្គការ​សហ​ប្រជាជាតិ ឱ្យបិទឃ្លាំងផ្ដល់ជំនួយនៅតំបន់ហ្កាហ្សាភាគខាងត្បូង មុនពេល​ប្រតិបត្តិការ​ថ្មើរ​ជើង​នៅ​ក្នុងតំបន់នេះ ដែលធ្វើឲ្យឃ្លាំងមួយនេះមិនអាចប្រើប្រាស់បាន។   

លោក Tedros បាននិយាយនៅលើបណ្ដាញសង្គម X ថា ថ្ងៃនេះអង្គការ​សហប្រជាជាតិ​បាន​ទទួល​ការ​ជូនដំណឹងពីកងកម្លាំងការពារអ៊ីស្រាអែលថា យើងគួរតែដកការ​ផ្គត់​ផ្គង់​របស់​យើង​ចេញ​ពី​ឃ្លាំង​វេជ្ជសាស្រ្តរបស់យើងនៅភាគខាងត្បូងតំបន់ហ្សាក្នុងរយៈពេល ២៤ ម៉ោង ដោយសារ​ប្រតិបត្តិការ​ថ្មើរជើងនឹងអាចបញ្ឈប់ដល់ដំណើរការប្រើប្រាស់នៅឃ្លាំងនោះ ។     

លោកបានសរសេរថា យើងអំពាវនាវដល់អ៊ីស្រាអែលឱ្យដកបទបញ្ជា ហើយចាត់​វិធានការ​គ្រប់​បែប​យ៉ាង​ដើម្បីការពារជនស៊ីវិល និងហេដ្ឋារចនាសម្ព័ន្ធស៊ីវិល រួមទាំងមន្ទីរពេទ្យ និងទីតាំង​មនុស្ស​ធម៌​នានា។

យោងតាមអង្គការសុខភាពពិភពលោក ចំនួន​មន្ទីរ​ពេទ្យ​ប្រតិបត្តិកា​រ​នៅ​ក្នុង​តំបន់​ហ្កាហ្សា​បាន​ធ្លាក់​ចុះពី ៣៦ទៅ ១៨ ក្នុងរយៈពេលតិចជាង៦០ ថ្ងៃ ក្នុងនោះមន្ទីរពេទ្យចំនួន៣ប៉ុណ្ណោះ ដែល​កំពុង​ផ្តល់បានត្រឹមតែជំនួយបឋមជាមូលដ្ឋាន និងសេវាផ្សេងទៀតដោយផ្នែក។

យោង​តាមអង្គការសុខភាពពិភពលោក មន្ទីរពេទ្យចំនួន១២ កន្លែងនៅតែ​ដំណើរ​ការ​នៅ​ផ្នែក​ខាង​ត្បូង​នៃ​តំបន់ហ្កាហ្សាស្ទ្រីប។ នៅក្នុងសន្និសីទសារព័ត៌មានមួយកាលពីព្រឹកថ្ងៃចន្ទ ប្រធានអង្គការ​សុខភាព​ពិភព​លោក​ប្រចាំ​តំបន់ មេឌីទែរ៉ាណេភាគខាងកើត លោក អាម៉េដ អាល់ ម៉ាន់ដារី (Ahmed al-Mandhari ) បាន​និយាយថា ការពង្រីកប្រតិបត្តិការយោធានៅតំបន់ហ្កាហ្សាភាគខាងត្បូង បានប្រឈម​នឹង​ការ​ដក​ហូត​ការថែទាំសុខភាពមនុស្សរាប់ពាន់នាក់៕