ក្រចេះ៖ បងប្អូនប្រជាពលរដ្ឋ ដែលរស់នៅតាមដងផ្លូវចាប់ពីរង្វង់មូលព្រាបសរ សល់​រង្វង់​មូល​ខ្លា​ស្ទុះ ​បានចូលរួមសហការយ៉ាងល្អជាមួយអាជ្ញាធរមូលដ្ឋាន ក្នុងការរុះរើ សំណង់ តូបលក់ដូរ សំយាប ស្លាកប៉ាណូ វត្ថុសម្ភារៈផ្សេងៗបានប្រមាណ៩៩% ដើម្បីឲ្យក្រុម ហ៊ុន​ទទួល​ការ​សាង​សង់​ផ្លូវ​ក្នុង​ក្រុងក្រចេះ ដាក់គ្រឿងចក្រឈូសឆាយ ទ្រង់ទ្រាយធំ។

សូមបញ្ជាក់ថា នៅថ្ងៃទី០៤ ខែធ្នូ ឆ្នាំ២០២៣នេះ ក្រុមហ៊ុន ស៊ាង ហៃ ជាក្រុម​ហ៊ុន​ទទួល​ការ​សាង​សង់​ផ្លូវ នៅចំណុចភូមិសាស្រ្តពីរង្វង់ព្រាបសរ ដល់រង្វង់មូលខ្លាស្ទុះ ក្នុងសង្កាត់អូរប្ញស្សី នឹង​សង្កាត់​ក្រចេះ ក្រុងក្រចេះ ក្រុមហ៊ុននឹងបន្តឈូសឆាយទ្រង់ទ្រាយធំ ដោយបាន​បែង​ចែក​ជា​ពីរ​ក្រុម ក្រុមទី១.ចាប់ពីរូបគ្រុឌ ទៅកើត ក្រុមទី២.ចាប់ពី រង្វង់មូលខ្លាស្ទុះ ទៅលិច ។

គួររំ​លឹកផងដែរថា រដ្ឋបាលខេត្តក្រចេះ ក៏បានចេញសេចក្ដីជូនដំណឹងស្តីពីការរុះរើបណ្តាញ អគ្គីសនី បណ្តាញទឹកស្អាត បណ្តាញខ្សែកាបអុបទិច និងផ្ទាំងប៉ាណូគ្រប់ប្រភេទ កាលពីខែវិច្ឆិកា ថា ដើម្បីឲ្យការសាងសង់ស្ពាន និងផ្លូវតភ្ជាប់ខាងលើ អនុវត្តបានឆាប់រហ័ស តាមផែនការកំណត់ និង​ការពារសុវត្ថិភាពដល់ក្រុមការងារសាងសង់ និងប្រជាពលរដ្ឋ និងដើម្បី​បញ្ចៀស​គ្រោះថ្នាក់​ផ្សេង​ៗ​កើតឡើងជាយថាហេតុ។ រដ្ឋបាលខេត្តក្រចេះ សូមស្នើអង្គភាពអគ្គីសនីក្រចេះ អាជីវករ​ទឹក​ស្អាត ​ក្រុមហ៊ុនខ្សែកាបអុបទិច និងក្រុមហ៊ុន បំពាក់​ និង​តម្លើង​ផ្លាក​ផ្សព្វ​ផ្សាយ​ពាណិជ្ជកម្ម​គ្រប់​ប្រភេទ​ ដែលប៉ះពាល់ដល់ការសាងសង់ ផ្លូវខាងលើ ត្រូវសហការជាមួយក្រុមហ៊ុនសាងសង់ស្ពាន និង​មន្ទីរសាធារណការ និងដឹកជញ្ជូនខេត្តក្រចេះ ដោយធ្វើការរុះរើ រំកិល​បណ្តា​ញ​ចេញ​ផុត​ពី​ការដ្ឋាន និងតាមដងផ្លូវដែល ពាក់ព័ន្ធចាប់ពីថ្ងៃជូនដំណឹងនេះតទៅ រហូតដល់ថ្ងៃទី១៥ ខែវិច្ឆិកា ឆ្នាំ​២០២៣ ជាកំហិត៕ ដោយ៖ សេង ម័រ