បាត់ដំបង៖ ប្រជាពលរដ្ឋមានជីវភាពខ្វះខាត រងគ្រោះដោយជំនន់ទឹកភ្លៀង និងគ្រោះរាំងស្ងួត ជាង ៦ពាន់គ្រួសារនៅតាមបណ្ដាស្រុកចំនួន១០ ក្នុងខេត្តបាត់ដំបង ទទួលបានស្បៀងបម្រុង និងស្រូវពូជពីរាជរដ្ឋាភិបាលជាបន្តបន្ទាប់ ដើម្បីដោះស្រាយជីវភាពប្រចាំថ្ងៃ និងឆ្លើយតបក្នុងការស្តារដាំដុះឡើងវិញ។
ក្នុងឱកាសអញ្ជើញសំណេះសំណាលសួរសុខទុក្ខ និងនាំយកគ្រាប់ពូជស្រូវរបស់សម្ដេចធិបតី ហ៊ុន ម៉ាណែត នាយករដ្ឋមន្រ្ដី នៃព្រះរាជាណាចក្រកម្ពុជា ចែកជូនប្រជាពលរដ្ឋក្រីក្រដែលរងផលប៉ះពាល់ដោយគ្រោះរាំងស្ងួត និងគ្រោះទឹកជំនន់ ក្នុងភូមិសាស្រ្ដស្រុកឯកភ្នំ ឯកឧត្តម សុខ លូ ប្រធានគណៈកម្មាធិការគ្រប់គ្រងគ្រោះមហន្ដរាយខេត្តបាត់ដំបង បានថ្លែងឱ្យដឹងថា គិតត្រឹមដើមខែធ្នូ ឆ្នាំ២០២៣នេះ អាជ្ញាធរខេត្តបាត់ដំបង បានទទួលស្បៀងបម្រុង និងស្រូវពូជ ហើយបានចុះចែកជាបន្តបន្ទាប់ ជូនដល់បងប្អូនប្រជាពលរដ្ឋសរុបចំនួន ៦ ៧១១គ្រសារ ក្នុងនោះគ្រួសារដែលទទួលបានពូជស្រូវដើម្បីយកទៅដាំដុះឡើងវិញ មានចំនួន ៧៥០គ្រួសារ និងគ្រួសារត្រូវទទួលបានស្បៀងមានចំនួន៥ ៩៦១គ្រួសារ។
ឯកឧត្តម សុខ លូ បានថ្លែងបន្ថែមថា ស្បៀង និងស្រូវពូជដែលចែកកន្លងមកនេះគឺសម្រាប់ដោះស្រាយឆ្លើយតបជូនបងប្អូនដែលរងគ្រោះដោយគ្រោះធម្មជាតិ និងគ្រោះរាំងស្ងួតកន្លងមកសម្រាប់ឆ្នាំ២០២៣នេះ។
ឯកឧត្តម សុខ លូ គូសបញ្ជាក់ថា ក្រោមការដឹកនាំដោយយកចិត្តទុកដាក់ពីសម្តេចធិបតី ហ៊ុន ម៉ាណែត ប្រមុខ នៃរាជរដ្ឋាភិបាលកម្ពុជាបានផ្តល់ស្បៀងបម្រុងរបស់រាជរដ្ឋាភិបាល ដើម្បីឆ្លើយតបជូនបងប្អូនមានជីវភាពក្រីក្រខ្វះខាតលំបាកខ្លាំងដែលបងប្អូនបានរងគ្រោះដោយគ្រោះជំនន់ទឹកភ្លៀងរហ័សកន្លងមក និងបងប្អូនដែលរងគ្រោះជួបប្រទះគ្រោះរាំងស្ងួត ដើម្បីជួយសម្រាលក្នុងការដោះស្រាយពីការលំបាកចាំបាច់ឆ្លើយតបជាបន្ទាន់ជូនដល់បងប្អូនហើយស្រូវពូជដែលផ្តល់ជូននៅពេលនេះ គឺដើម្បីឲ្យបងប្អូនយកទៅធ្វើការដាំដុះ និងស្តារឡើងវិញបានទាន់ពេលវេលា មិនមែនឱ្យយកទៅកិនហូបនោះទេ ។
ជាមួយគ្នានោះ ឯកឧត្តម បានណែនាំដល់បងប្អូនប្រជាពលរដ្ឋត្រូវខិតខំដាំដុះបន្លែផ្លែឈើនៅបរិវេណជុំវិញផ្ទះឱ្យបានច្រើនសម្រាប់ផ្គត់ផ្គង់ការហូបចុកប្រចាំថ្ងៃ និងកាត់បន្ថយការចំណាយលើកកម្ពស់ជីវភាពគ្រួសារបានមួយផ្នែក។
ឯកឧត្តម សុខ លូ បានអំពាវនាវ និងក្រើនរំលឹកដល់អាជ្ញាធរ កងកម្លាំង និងប្រជាពលរដ្ឋទាំងអស់ត្រូវរួមគ្នាក្នុងការការពារថែរក្សាឱ្យបាននូវសុខសន្តិភាព ស្ថិរភាពនយោបាយ និងត្រូវខិតខំបន្តចូលរួមអនុវត្ត និងគាំទ្រការដាក់ចេញគោលនយោបាយបញ្ចកោណ ដំណាក់កាលទី១ របស់រាជរដ្ឋាភិបាល អាណត្តិទី៧ ដើម្បីនាំមកនូវការអភិវឌ្ឍន៍រីកចម្រើនសំរាប់អនាគតប្រទេសជាតិ និងកូនចៅយើងជំនាន់ក្រោយៗទៀត៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
