រាជរដ្ឋាភិបាលកម្ពុជា នៅថ្ងៃទី ៥ ខែធ្នូ ឆ្នាំ ២០២៣នេះ បានដាក់​សម្ពោធ​កម្ម​វិធី​ជំនួយ​សង្គម​ថ្មី​ចំនួន២ រួមមានកម្មវិធីកញ្ចប់គ្រួសារ និងកម្មវិធីពាក់ព័ន្ធនឹងការឆ្លើយតបនឹងគ្រោះអាសន្ន។ ក្រោយ​ប្រកាសដាក់សម្ពោធនៅថ្ងៃនេះ ក្រុមគោលដៅស្ថិតក្នុងគ្រួសារក្រីក្រ បង្ហាញភាព​សប្បាយ​ចិត្ត​ជាខ្លាំង ដែលរាជរដ្ឋាភិបាលបន្តផ្ដល់ថវិកាជួយពួកគេជារៀងរហូត។

កម្មវិធីកញ្ចប់គ្រួសារ ជាកម្មវិធីជាតិមានលក្ខណៈអចិន្ត្រៃយ៍ ផ្តោតសំខាន់ជួយដល់ក្រុមគោលដៅ ដែល​រស់​នៅក្នុងគ្រួសារក្រីក្រដែលមានបណ្ណសមធម៌។ កម្មវិធីនេះនឹងដាក់ឱ្យអនុវត្តចាប់ពីខែ មេសា ឆ្នាំ ២០២៤ ដោយវាជាកម្មវិធីទម្រ ចូលមកជំនួស កម្មវិធី​ឧបត្ថម្ភ​សាច់​ប្រាក់​ជូន​គ្រួសារ​ក្រីក្រ និង​ងាយរងគ្រោះកំឡុងពេលប្រយុទ្ធប្រឆាំងកូវីដ-១៩។

សម្រាប់ក្រុមគោលដៅ ជាជនមានពិការភាព និងមនុស្សវ័យចាស់ ដែលមានបណ្ណក្រីក្រ រស់​នៅ​ក្នុង​សង្កាត់ដង្កោ រាជធានីភ្នំពេញ បានលើកឡើងពីសប្បាយចិត្តជាខ្លាំង នៅពេល​ពួក​គេ​ទទួល​ដំណឹង​ថា រាជរដ្ឋាភិបាលនឹងបន្តជួយថវិកាដល់ពួកគេជារៀងរហូត។ ពួកគេលើកឡើងដែរថា រាជ​រដ្ឋាភិបាលតែងគិតគូពីប្រជាពលរដ្ឋ ពិសេសពលរដ្ឋក្រីក្រដូចពួកគេ ជាក់​ស្ដែងពួ​ក​គេ​ទទួល​បាន​ថវិកា​ជា​ប្រចាំខែ តាំងការរាតត្បាតកូវីដ-១៩ ក្នុងឆ្នាំ ២០២០មកម្លេះ។

សម្រាប់ការដាក់ឱ្យអនុវត្តកម្មវិធីជំនួយសង្គមថ្មីនេះ ឯកឧត្តម ចន ណារិទ្ធ ជាអគ្គ​លេខា​ធិការ​ក្រុម​ប្រឹក្សា​ជាតិ​គាំពារសង្គម លើកឡើងថា វាជាកម្មវិធីជំនួយសង្គមគ្រប់ជ្រុងជ្រោយ ជួយដល់​ពលរដ្ឋ​ក្រីក្រ​ចា​ប់តាំងពីចាប់កំណើតនៅក្នុងផ្ទៃ។

តាមរយៈក្រុមប្រឹក្សាជាតិគាំពារសង្គមដដែល បានប៉ាន់ប្រមាណថា ក្នុងឆ្នាំ២០២៤ខាងមុខ រាជ​រដ្ឋាភិបាលបានគ្រោងថវិកាប្រមាណ ៦៧៤,៥ ប៊ីលានរៀល ស្មើនឹង ១៦៥ លានដុល្លារអាមេរិក សម្រាប់​អនុវត្តកម្មវិធីជាតិជំនួយសង្គមក្នុងកញ្ចប់គ្រួសារនេះ៕ អត្ថបទ៖ គឹម ហុក