​​អ៊ីស្រាអែល៖ រដ្ឋមន្ត្រី​ក្រសួងការបរទេស​ថ្មី​របស់​អ៊ីស្រាអែល ​លោក Yair Lapid បាន​ចូលកាន់​តួនាទី​ជា​ផ្លូវការ​កាលពី​ថ្ងៃ​ចន្ទ បន្ទាប់ពី​ពិធី​ប្រគល់ និង​ទទួល​តំណែង​ជាមួយ​អ្នក​កាន់​តំណែង​មុន​របស់​លោក​គឺ​លោក Gabi Ashkenazi​។​

លោក Lapid ដែល​ស្ថិត​ក្រោម​កិច្ចព្រមព្រៀង​ចម្រុះ​ នឹង​កាន់​តំណែង​សម្រាប់​រយៈពេល ២​ឆ្នាំ​ដំបូង ​ហើយ​បន្ទាប់មក​ក្លាយ​ជា​នាយករដ្ឋមន្ត្រី​នោះ​បាន​ថ្លែង​ថា​ លោក​បាន​និយាយ​ជាមួយ​រដ្ឋមន្ត្រី​ក្រសួង​ការបរទេស​សហរដ្ឋអាមេរិក ​លោក Antony Blinken រួចហើយ អ្នក​ទាំង​ពីរ​បាន​ព្រមព្រៀងគ្នា​ ''កសាង​ទំនាក់​ទំនង​ដោយ​ផ្អែក​លើ​ការ​គោរព​គ្នា​ទៅវិញទៅមក ​និង​កិច្ចពិភាក្សា​ល្អ​ប្រសើរ​''។ លោក Lapid បាន​សន្យា​ថា​ នឹង​ធ្វើ​ឱ្យ​ប្រសើរ​ឡើង​នូវ​ទំនាក់ទំនង​ ជាមួយ​គណបក្ស​ប្រជាធិបតេយ្យ​នៅ​សហរដ្ឋ​អាមេរិក ដែល​លោក​បាន​និយាយ​ថា ​បាន​ក្លាយ​ជា​រឿង ​"​គួរ​ឱ្យ​អាម៉ាស់ និង​គ្រោះថ្នាក់​" ក្រោម​ការ​ដឹក​នាំ​របស់​អតីត​នាយករដ្ឋមន្ត្រី Benjamin Netanyahu។​

លោក​បាន​និយាយ​ថា​ លោក​នឹង​ធ្វើការ​ដើម្បី​ពង្រឹង​សន្តិភាព​ជាមួយ​រដ្ឋ​តំបន់​ឈូង​សមុទ្រ ​អេ​ហ្ស៊ី​ប និង​ហ្ស៊​កដា​នី និង​ផ្សះផ្សា​ទំនាក់ទំនង​ជាមួយ​ស​ហ​ភាព​អឺរ៉ុប ​និង​ប្រជាពលរដ្ឋ​ជ្វី​ហ្វ ​អាមេរិកជា​ទំនាក់​ទំនង​ដែល​លោក Lapid បាន​និយាយ​ថា ​បាន​ដើរ​ថយក្រោយ​នៅ​ក្រោម​ការដឹកនាំ​របស់​លោក Netanyahu៕

អត្ថបទ៖ សុខ​មាន