កំពង់ឆ្នាំង៖ នៅព្រឹកថ្ងៃទី០៥ ខែធ្នូ ឆ្នាំ២០២៣នេះ ឯកឧត្តម អ៊ុក រ៉ាប៊ុន ប្រធាន​កិត្តិយស​សាខា​កាក​បាទ​ក្រហមខេត្តកំពង់ឆ្នាំង បានប្រារព្វទិវាកាកបាទក្រហម-អឌ្ឍចន្ទក្រហម ៨ឧសភា លើក​ទី១៦០ ក្រោមប្រធានបទ «រួមគ្នាជាមួយកាកបាទក្រហមកម្ពុជា ដើម្បីបរិយាបន្នសង្គម» ហើយ​សាខា​កាក​បាទក្រហមកម្ពុជាខេត្ត ប្រមូលមូលនិធិបានជាង ១៧ម៉ឺនដុល្លារ​ សម្រាប់​ការ​ប្រើប្រាស់​ជួយ​ប្រជាពលរដ្ឋក្នុងខេត្តផងដែរ ។

ឯកឧត្តម អ៊ុក រ៉ាប៊ុន ប្រធានកិត្តិយសសាខាកាកបាទក្រហមខេត្តកំពង់ឆ្នាំងបានអោយដឹងថា ការ​ចូលរួម​សកម្មភាពមនុស្សធម៌ជាមួយសាខាកាកបាទក្រហមកម្ពុជា សម្រាប់បន្តប្រើប្រាស់​ក្នុង​ការ​ជួយ​សង្គ្រោះ​ដល់ប្រជាពលរដ្ឋដែលរងគ្រោះមហន្តរាយផ្សេងៗ ដោយមិន​រើស​អើង​វណ្ណៈ​ជាតិ​សាសន៍​ពណ៌​សម្បុរ ឬនិន្នាការនយោបាយអ្វីនោះឡើយ។ ទិវាពិភពលោកកាកបាទក្រហម និង​អឌ្ឍ​ចន្ទ​ក្រហម៨ឧសភា តែងតែប្រារព្វធ្វើជារៀងរាល់ឆ្នាំ និង មាន​សប្បុរស​ជន​គ្រប់​មជ្ឈដ្ឋាន​ដែល​មាន​សទ្ធាជ្រះថ្លា ចូលរួមបរិច្ចាគថវិកាជូនកាកបាទក្រហមកម្ពុជា សម្រាប់​យក​ទៅ​ធ្វើ​សកម្មភាព​មនុស្សធម៌ដោះស្រាយការលំបាកជូនប្រជាពលរដ្ឋដែលរងគ្រោះ និងងាយ​រង​គ្រោះ​នៅ​ទូទំាង​ប្រទេស ខណៈ​កាក​បាទ​ក្រហម​កម្ពុជា​ត្រូវ​បាន​បង្កើត​ឡើងក្នុង​គោល​បំណង​ផ្តល់​ជំនួយ​សង្គ្រោះ និងធ្វើជាជំនួយការឱ្យអាជ្ញាធរសាធារណៈ ក្នុងវិស័យមនុស្សធម៌ ដើម្បី​សម្រាល​ទុក្ខ​លំបាក​របស់​ប្រជាពលរដ្ឋងាយរងគ្រោះបំផុតក្នុងប្រទេស។

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បាន​ប្តេជ្ញា​ដង្ហែ​តាម​ព្រះ​រាជ​គន្លង​វីរគំរូមនុស្សធម៌ព្រះករុណា ព្រះបាទសម្តេចព្រះនរោត្តម សីហនុ ព្រះវររាជបិតាជាតិខ្មែរ ព្រះបរមរតនកោដ្ឋ សម្តេចព្រះមហាក្សត្រី ព្រះវររាជមាតាជាតិខ្មែរ នរោត្តម មុនិនាថ សីហនុ​ព្រះ​ប្រធា​នកិត្តិយសកាកបាទក្រហមកម្ពុជា និងព្រះករុណាព្រះបាទសម្តេចព្រះបរមនាថនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដើម្បីសុខុមាលភាពប្រជាពលរដ្ឋរងគ្រោះ និង​ងាយ​រងគ្រោះបំផុតនៅក្នុងប្រទេស ៕ កាំង ហុងវាស្នា