ប្រទេសកាតាកាលពីថ្ងៃចន្ទ បានប្រកាសផ្តល់វិភាគទានចំនួន ៦៥,៧ លានដុល្លារ រីយ៉ាល់កាតា (ប្រហែល ១៨លានដុល្លារអាមេរិក) ដល់ទីភ្នាក់ងារជំនួយនិងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន នៅតំបន់ជិតបូព៌ា (UNRWA) សម្រាប់ឆ្នាំ ២០២៣ និង២០២៤។

សេចក្តីថ្លែងការណ៍មួយពីក្រសួងការបរទេស បានឲ្យដឹងថា៖«ប្រទេសកាតា បានពន្លឿនការបំពេញការសន្យារបស់ខ្លួនចំពោះ UNRWA សម្រាប់ឆ្នាំ ២០២៤ ដើម្បីគាំទ្រដល់ប្រជាជនប៉ាឡេស្ទីនជាបងប្អូន ដោយសារលក្ខខណ្ឌមនុស្សធម៌ដ៏លំបាក ដែលពួកគេ កំពុងប្រឈមមុខ និងដើម្បីរួមចំណែកដល់បិទបញ្ចប់ការខ្វះថវិការបស់ទីភ្នាក់ងារនេះ»។

ក្រសួងបាននិយាយថា កាតាគឺជាប្រទេសអារ៉ាប់ដំបូងគេដែលបានចុះហត្ថលេខាលើកិច្ចព្រមព្រៀងរយៈពេលជាច្រើនឆ្នាំជាមួយ UNRWA ក្នុងឆ្នាំ ២០១៨ ដើម្បីគាំទ្រធនធានសំខាន់ៗរបស់ខ្លួន។

ប្រជាជនប៉ាឡេស្ទីនរាប់លាននាក់ពឹងផ្អែកលើ UNRWA ដែលជាទីភ្នាក់ងារដ៏សំខាន់របស់UN សម្រាប់ការទទួលបានការផ្គត់ផ្គង់ចាំបាច់សម្រាប់ការរស់នៅ។