ប្រធានាធិបតីរុស្ស៊ីលោក Vladimir Putin បាននិយាយកាលពីថ្ងៃចន្ទថា កិច្ចសហប្រតិបត្តិការរវាងទីក្រុងម៉ូស្គូ និងទីក្រុងប៊ែរឡាំង ត្រូវបានបែកបាក់ដោយសារតែការបំផ្ទុះកាលពីខែកញ្ញា ឆ្នាំ ២០២២ ធ្វើឲ្យប៉ះពាល់ដល់បំពង់បង្ហូរឧស្ម័ន Nord Stream ដែលបូមឧស្ម័នរុស្ស៊ីទៅកាន់ប្រទេសអាល្លឺម៉ង់ក្រោមសមុទ្របាល់ទិក ។

 លោក Putin បានផ្តល់សេចក្តីអធិប្បាយបែបនេះ ស្របពេលដែលទទួលសារតាំងរបស់ឯកអគ្គរដ្ឋទូតបរទេសថ្មីជាង ២០រូប មកកាន់ប្រទេសរុស្ស៊ី រួមទាំងឯកអគ្គរដ្ឋទូតមកពីអាល្លឺម៉ង់ និងអង់គ្លេសផងដែរ នៅក្នុងពិធីមួយរៀបចំឡើងនៅក្នុងវិមានក្រឹមឡាំង ។

 លោក Putin និយាយថា ស្ថានភាពជាប់គាំងបច្ចុប្បន្ននៃទំនាក់ទំនងរបស់អាល្លឺម៉ង់ជាមួយរុស្ស៊ី មិនមែនជាគំនិតផ្ដួចផ្ដើមរបស់ពួកយើងនោះទេ លោកចង់បញ្ជាក់ថាវាគ្មានផលចំណេញនោះទេ ។ វាគ្មានផលចំណេញទាំងសម្រាប់ពួកយើង និងទាំងសម្រាប់អ្នក ប៉ុន្តែតាមទស្សនៈរបស់លោក គឺគ្មានផលចំណេញជាពិសេសសម្រាប់អាល្លឺម៉ង់ ។

 លោកថា ថាមពលតែងតែជាវិស័យដ៏ទាក់ទាញនៃកិច្ចសហប្រតិបត្តិការទ្វេភាគី ហើយកិច្ចសហប្រតិបត្តិការនេះ ត្រូវបានបំបែកដោយសារការបំផ្លិចបំផ្លាញបំពង់បង្ហូរឧស្ម័ន Nord Stream ។

 លោក Putin បាននិយាយផងដែរថា លោកសង្ឃឹមថា ទំនាក់ទំនងរវាងទីក្រុងម៉ូស្គូ និងទីក្រុងឡុងដ្រ៍ នឹងល្អប្រសើរឡើងវិញ ។

 សូមបញ្ជាក់ថា រុស្ស៊ី បានដាក់ការស្តីបន្ទោសសហរដ្ឋអាមេរិក អង់គ្លេស និងអ៊ុយក្រែនថា ជាអ្នកបំផ្ទុះបំពង់បង្ហូរឧស្ម័ន Nord Stream ប៉ុន្តែពួកគេបានច្រានចោលរាល់ការជាប់ពាក់ព័ន្ធទាំងអស់ ។

 ទំនាក់ទំនងរបស់រុស្ស៊ីជាមួយបណ្តាប្រទេសលោកខាងលិច បានធ្លាក់ដល់កម្រិតទាបបំផុត ចាប់តាំងពីការបញ្ចប់សង្រ្គាមត្រជាក់ បន្ទាប់ពីការសម្រេចចិត្តរបស់រុស្ស៊ី កាលពីខែកុម្ភៈ ឆ្នាំ ២០២២កន្លងទៅក្នុងការបញ្ជូនទាហានរាប់សែននាក់ចូលទៅក្នុងប្រទេសអ៊ុយក្រែន ធ្វើឲ្យកើតមានទណ្ឌកម្មសេដ្ឋកិច្ចរបស់លោកខាងលិច ៕