ភ្នំពេញ ៖ ឯកឧត្ដមសន្តិបណ្ឌិត នេត សាវឿន ឧបនាយករដ្ឋមន្រ្តី នៅរសៀលថ្ងៃទី០៥ ខែធ្នូ ឆ្នាំ២០២៣ បានអនុញ្ញាតឱ្យឯកឧត្ដម ង្វៀន ហ៊ុយតាំង(Nguyen Huy Tang) ឯកអគ្គរដ្ឋទូត នៃសាធារណរដ្ឋសង្គមនិយមវៀតណាមប្រចាំកម្ពុជា ចូលជួបសម្តែងការគួរសម នៅវិមានសន្តិភាព។​

ក្នុងជំនួបនេះឯកឧត្ដមឧបនាយករដ្ឋមន្ត្រី បានជម្រាបជូនឯកឧត្ដមឯកអគ្គរដ្ឋទូតវៀតណាម អំពីវឌ្ឍនភាពរាជរដ្ឋាភិបាល ក្នុងនីតិកាលថ្មី ដែលបង្កើតបានជាង១០០ថ្ងៃនេះ ហើយបន្ដរក្សាបាននូវសន្ដិភាព សុវត្ថិភាព វិបុលសុខ ភាពរីកចម្រើន និងជាពិសេសរក្សានូវភាពសុខសាន្ដជូនប្រជាពលរដ្ឋទាំងមូល ក្រោមការដឹកនាំប្រកបដោយគតិបណ្ឌិតរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី។

ឯកឧត្ដមក៏បានលើកឡើងអំពីទិសដៅអាទិភាពដ៏សំខាន់របស់រាជរដ្ឋាភិបាល គឺការបន្ដពង្រឹងនូវសុខសុវត្ថិភាពជូនដល់ប្រជាពលរដ្ឋ ក៏ដូចជាការប្រយុទ្ធប្រឆាំងបទល្មើសគ្រឿងញៀន។ ក្នុងជំនួបនេះដែរ ឯកឧត្ដម នេត សាវឿន ក៏បានបញ្ជាក់ពីកិច្ចសហប្រតិបត្តិការល្អរវាងប្រទេសទាំងពីរកម្ពុជា-វៀតណាម លើវិស័យពាណិជ្ជកម្ម សេដ្ឋកិច្ច ពិសេសលើវិស័យសន្ដិសុខ ដែលសហការបានយ៉ាងល្អក្នុងការបង្ការ ទប់ស្កាត់ និងបង្ក្រាបបទល្មើសឆ្លងដែនគ្រប់ប្រភេទ។

ក្នុងជំនួបនេះដែរ ឯកឧត្ដមឯកអគ្គរដ្ឋទូតវៀតណាម បានកោតសរសើរដោយស្មោះអស់ពីចិត្ត ចំពោះរា ជរដ្ឋាភិបាលកម្ពុជា ដែលសម្រេចបាននូវសមិទ្ធផលជាច្រើន ក្នុងនោះមានដូចជា ការគ្រប់គ្រងការឆ្លងរីករាលដាលជំងឺកូវីដ-១៩, ការធ្វើជាម្ចាស់ផ្ទះនៃកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ, ការបោះឆ្នោតជ្រើសរើសក្រុមប្រឹក្សាឃុំសង្កាត់, ការបោះឆ្នោតជ្រើសតាំងតំណាងរាស្ដ្រនីតិកាលទី៧ និងការធ្វើជាម្ចាស់ផ្ទះនៃការរៀបចំព្រឹត្តិការណ៍ប្រកួតកីឡាស៊ីហ្គេម និងអាស៊ានប៉ារ៉ាហ្គេមជាដើម។

ឯកឧត្ដមបន្តថា តាំងពីនីតិកាលចាស់ ក្រោមការដឹកនាំរបស់សម្ដេចតេជោ ហ៊ុន សែន អតីតនាយករដ្ឋមន្ដ្រី បន្ដរហូតមកដល់នីតិកាលថ្មី ក្រោមការដឹកនាំរបស់សម្ដេចធិបតី ហ៊ុន ម៉ាណែត នៅតែបន្ដដឹកនាំទទួលបានជោគជ័យក្នុងការរក្សានូវសុខសន្ដិភាព និងសុវត្ថិភាពជូនដល់ប្រជាពលរដ្ឋទាំងអស់ ក្នុងនោះវិស័យសំខាន់ៗជាច្រើនមានការរីកចម្រើនគួរឱ្យកត់សម្គាល់។

ឯកឧត្ដមឯកអគ្គរដ្ឋទូត ក៏បានវាយតម្លៃខ្ពស់ ចំពោះកិច្ចសហប្រតិបត្តិការនាពេលកន្លងមក ពិសេសលើការងារសន្ដិសុខ ដោយឈានដល់ការបង្ក្រាប និងទប់ស្កាត់បទល្មើសឆ្លងដែនគ្រប់ប្រភេទ។ កន្លងមកនេះឯកឧត្ដមឧបនាយករដ្ឋមន្ដ្រី នេត សាវឿន ក៏បានដើរតួនាទីយ៉ាងសំខាន់ និងធ្វើការយ៉ាងជិតស្និទ្ធជាមួយភាគីវៀតណាមផងដែរ។

ក្នុងជំនួបនោះ ភាគីទាំងពីរបានឯកភាពគ្នាទាំងស្រុង ក្នុងការបន្ដកិច្ចសហប្រតិបត្តិការសំខាន់ៗ លើកា រងារមួយចំនួនដូចជា ការបន្ដផ្លាស់ប្ដូរព័ត៌មានសន្ដិសុខនានា, សហការផ្លាស់ប្ដូរប្រតិភូទៅវិញទៅមក ដើម្បីបន្ដរឹតចំណងមិត្តភាពរវាងកម្ពុជា-វៀតណាម, បន្ដទប់ស្កាត់បទល្មើសឆ្លងដែនគ្រប់ប្រភេទ ពិសេ សបទល្មើសគ្រឿងញៀន និងបន្ដកិច្ចសហប្រតិបត្តិការលើការងារគ្រប់វិស័យ ក្នុងនោះមានទាំងសេដ្ឋកិច្ច និងទេសចរណ៍ជាដើម៕​ដោយ៖ បាន ចក់