កងកម្លាំងអ៊ីស្រាអែលបានវាយសម្រុកចូលក្នុងទីក្រុងសំខាន់ភាគខាងត្បូងក្នុងតំបន់ហ្កាហ្សាកាលពីថ្ងៃអង្គារ ទី ៥ ខែធ្នូ ជាអ្វីដែលពួកគេហៅថាជាថ្ងៃនៃការប្រយុទ្ធដ៏ខ្លាំងក្លាបំផុតក្នុងរយៈពេល៥សប្តាហ៍នៃប្រតិបត្តិការថ្មើរជើងប្រឆាំងនឹងក្រុមសកម្មប្រយុទ្ធហាម៉ាស ហើយមន្ទីរពេទ្យនានាបានតស៊ូទប់ទល់ទៅនឹងចំនួនអ្នកស្លាប់ និងរបួសជាច្រើននាក់របស់ជនជាតិប៉ាឡេស្ទីន។

ជាអ្វីដែលទំនងជាការវាយលុកដោយថ្មើរជើងដ៏ធំបំផុតនៅក្នុងតំបន់ហ្កាហ្សា ចាប់តាំងពីបទឈប់បាញ់ជាមួយក្រុមហាម៉ាស់បានផុតកំណត់កាលពីសប្តាហ៍មុន អ៊ីស្រាអែលបាននិយាយថា កងទ័ពរបស់ខ្លួន គាំទ្រដោយយន្តហោះចម្បាំងបានទៅដល់កណ្ដាលទីក្រុង ខានយូនីស(Khan Younis)ហើយក៏កំពុងឡោមព័ទ្ធជុំវិញទីក្រុងនេះផងដែរ។លោកឧត្តមសេនីយ យ៉ារ៉ុន ហ្វីនគេម៉ាន់(Yaron Finkelman) មេបញ្ជាការនៃបញ្ជាការដ្ឋានភាគខាងត្បូងរបស់យោធាអ៊ីស្រាអែល បាននិយាយនៅក្នុងសេចក្តីថ្លែងការណ៍មួយថា យើងស្ថិតក្នុងថ្ងៃដ៏តានតឹងខ្លាំងបំផុត ចាប់តាំងពីការចាប់ផ្តើមប្រតិបត្តិការថ្មើរជើង។ 

លោកបាននិយាយថា កងកម្លាំងអ៊ីស្រាអែលក៏កំពុងប្រយុទ្ធគ្នានៅក្នុងទីក្រុងចាបាលីយ៉ា(Jabalia) ដែលជាជំរំជនភៀសខ្លួនក្នុងទីក្រុងដ៏ធំ និងសមរភូមិក្តៅគគុករបស់ក្រុមហាម៉ាសនៅភាគខាងជើងតំបន់ហ្កាហ្សា ក្បែរទីក្រុងហ្កាហ្សា និងនៅស្រុកស៊ូចាអៃយ៉ា (Shuja'iyya) ភាគខាងកើតទីក្រុងនេះ។      

កងពលប្រដាប់អាវុធរបស់ហាម៉ាស ដែលជាកងពលតូចអាល់កាសាម(al Qassam) បាននិយាយថា អ្នកប្រយុទ្ធរបស់ខ្លួនបានបំផ្លាញ ឬធ្វើឲ្យខូចខាតរថយន្តយោធាអ៊ីស្រាអែល ២៤ គ្រឿង ហើយអ្នកបាញ់ស៊ីបបានសម្លាប់ទាហានអ៊ីស្រាអែល៨នាក់ នៅក្នុងការប៉ះទង្គិចគ្នាដែលកំពុងបន្តនៅក្នុងតំបន់ផ្សេងៗនៃទីក្រុង Khan Younis ។ដោយឡែក មន្ត្រីសុខាភិបាលហ្កាហ្សាបាននិយាយថា មនុស្សមួយចំនួនធំត្រូវបានសម្លាប់នៅក្នុងការវាយប្រហាររបស់អ៊ីស្រាអែលទៅលើលំនៅឋាននានានៅក្នុងទីក្រុងឌៀ អាល់ បាឡា (Deir al-Balah) ភាគខាងជើងក្រុង Khan Younis ។ លោកវេជ្ជបណ្ឌិត អ៊ីយ៉ាដ អាល់ ចាប្រ៊ី (Eyad Al-Jabri) ប្រធានមន្ទីរពេទ្យ ស៊ូហាដា អាល់អាកសា (Shuhada Al-Aqsa) នៅទីនោះបានប្រាប់សារព័ត៌មាន(Reuters)ថា មនុស្សយ៉ាងហោចណាស់៤៥នាក់បានស្លាប់ ។ សារព័ត៌មាននេះ មិនអាចទៅដល់តំបន់នោះ ឬបញ្ជាក់ចំនួនអ្នកស្លាប់បានទេ៕