ប្រធានជំនួយរបស់សហរដ្ឋអាមេរិក លោកស្រី សាមែនថា ផៅវើ (Samantha Power) បាន​ទៅដ​ល់ឧបទ្វីបស៊ីណៃ ប្រទេសអេហ្ស៊ីប កាលពីថ្ងៃអង្គារ (០៥ ធ្នូ) ជាទីដែល​លោក​ស្រី​បាន​ប្រកាស​ផ្តល់​ជំនួយបន្ថែមចំនួនជាង ២១លានដុល្លារសម្រាប់ប្រជាជនប៉ាឡេស្ទីន ដែលរង​ផល​ប៉ះពាល់​ដោយជម្លោះរវាងអ៊ីស្រាអែល និងក្រុមអ៊ីស្លាមហាម៉ាស។

យោងតាមសេចក្តីថ្លែងការណ៍មួយបានឱ្យដឹងថា អ្នកគ្រប់គ្រងទីភ្នាក់ងារជំនួយអាមេរិក USAID រូបនេះបានទៅ​ដល់ទីក្រុង អាល់ អារីស (Al Arish) ជាមួយនឹងការផ្តល់ជំនួយស្បៀង​អាហារ​ចំនួន ៣៦.០០០ផោន និងការផ្គត់ផ្គង់ផ្នែកវេជ្ជសាស្រ្ត ដែលដឹក​តាម​យន្តហោះ​ដោយ​ក្រសួង​ការពារ​ជាតិ​ពីប្រទេសហ្ស៊កដានី ហើយមានបំណងទៅកាន់តំបន់ហ្កាហ្សា។

ជំនួយបន្ថែម​ដែល​លោកស្រី ផៅវើ បានប្រកាសកាលពីថ្ងៃអង្គារ នឹងគាំទ្រដល់ការផ្តល់អនាម័យ និង​ការ​ផ្គត់ផ្គង់កន្លែងស្នាក់នៅ ស្បៀងអាហារ និងជំនួយផ្សេងទៀតសម្រាប់អ្នកស្រុកហ្កាហ្សា និង​តំបន់វេសបែង ដែលរងផលប៉ះពាល់ដោយជម្លោះ នេះបើយោង​តាម​សេចក្តី​ថ្លែង​ការណ៍​ដាច់​ដោយ​ឡែក​មួយ។

មូលនិធិនេះក៏នឹងគាំទ្រដល់ការថែទាំផ្លូវចិត្ត និងសេវាសុខភាពសំខាន់ៗ រួមជាមួយ​នឹង​ការ​បង្កើត​មន្ទីរ​ពេទ្យ​វាល​ដែល​ដំណើរ​ការដោយអង្គការក្រៅរដ្ឋាភិបាលនៅហ្កាហ្សា ដែលនឹងផ្តល់ការ​ថែទាំ​អ្នក​ជំងឺ។ មន្ទីរពេទ្យនៅហ្កាហ្សា នៅសល់តែមួយ​ចំនួន​ប៉ុណ្ណោះ​ដែល​នៅតែ​ដំណើរ​ការ​ដោយ​សារ​ការ​ទម្លាក់​គ្រាប់បែករបស់អ៊ីស្រាអែល និងកង្វះប្រេងឥន្ធនៈ ហើយមន្ទីរពេទ្យ​ទាំង​នោះកំ​ពុង​ជួប​ការ​លំបាក​កាន់តែខ្លាំងឡើងដោយរលកថ្មីនៃអ្នករបួស៕