ត្បូងឃ្មុំ៖ ការសាបព្រោះដាំដុះស្រូវប្រាំងរបស់ប្រជាពលរដ្ឋក្នុងខេត្តត្បូងឃ្មុំ ឆ្នាំនេះ ហាក់មានភាព យឺតយ៉ាវ ជាងឆ្នាំមុន ដែលការយឺតយ៉ាវនេះ ត្រូវបានមន្រ្តីជំនាញ និងប្រជាពលរដ្ឋនិយាយថា ដោយ​សារ​តែមានភ្លៀងធ្លាក់ច្រើននៅចុងរដូវវស្សា និងដោយសារការប្រមូលស្រូវវស្សា ក៏មាន​ភាព​យឺតយ៉ាវ ដែលរហូតមក ដល់ពេលនេះ ស្រូវវស្សាប្រភេទស្រូវធ្ងន់ខ្លះ មិនទាន់​បាន​ច្រូត​កាត់​នៅ​ឡើយ​ទេ។

កសិករ បាននិយាយថា បើទោះបីការសាបព្រោះដកស្ទូងមានសភាពយឺតយ៉ាវបន្តិចក្ដី ក៏មិនប៉ះ ពាល់​ដល់ការងារបង្កបង្កើនផលដែរ។ មិនប៉ះពាល់ ដោយសារ បច្ចុប្បន្ននេះ តាមស្រែ​ប្រជាពលរដ្ឋ​មួយចំនួនធំ មានអណ្តូងទឹក ដែលអាចបូមស្រោចស្រពស្រូវបានគ្រប់ពេល ទោះបីគ្មានភ្លៀង ។

តែ​កសិករមួយចំនួន បានឱ្យដឹងថា ការធ្វើស្រូវវស្សា ប្រភេទស្រូវកណ្តាល ឆ្នាំនេះ បាត់បង់ទិន្នផល ច្រើន​ជាងឆ្នាំមុន ព្រោះស្រូវដួលពិបាកច្រូត តែឆ្នាំនេះ ស្រូវមានតម្លៃខ្ពស់ជាងឆ្នាំមុន គឺអាច​លក់​បានចន្លោះ ពី១១៥០រៀល ទៅ១២៥០រៀល ក្នុងមួយគីឡូក្រាម ។ បើសិន​ស្រូវ​នៅ​តែ​មាន​តម្លៃ​បែប​នេះ ការប្រមូល ផលស្រូវប្រាំង ប្រភេទស្រូវស្រាល នៅពេលខាងមុខ គឺអាចទទួល​បាន​ប្រាក់​ចំណេញ។

លោក ហេង ពិសិដ្ឋ ប្រធានមន្ទីកសិកម្ម រុក្ខាប្រមាញ់ និងនេសាទ បានឱ្យដឹងថា ការងារបង្កបង្កើន ផល​ស្រូវរដូវប្រាំង ឆ្នាំ២០២៤ មកដល់ពេលនេះ គឺភ្ជួររាស់បានជាង៦០០០ហិកតា ស្មើ​នឹង​ជាង​៤៩​ភាគរយ នៃផែនការដាំដុះ និងដាំដុះសម្រេចបានជាង៥,៨០០ហិកតា ស្មើនឹងជាង​៤៥​ភាគរយ​ យឺតជាងឆ្នាំមុន ជាង៣,៧០០ហិកតា ។ ការយឺតយ៉ាវនេះ បណ្តាលមកពីក្នុងឆ្នាំនេះ របប​ទឹកទន្លេមេគង្គបានហក់ឡើងខ្ពស់ ចំនួន២លើក ធ្វើឱ្យរបបទឹក បានហូរចូលទៅក្នុងបឹង និង​តំបន់​ផ្ទៃរងរបបទឹកទន្លេមេគង្គជាថ្មី ។ ម្យ៉ាងវិញទៀតនៅចុងរដូវវស្សាឆ្នាំនេះ ពោលគឺ​ក្នុង​ខែ​កញ្ញា និងខែតុលា ខេត្តត្បូងឃ្មុំ បានទទួលរងនូវជ្រលងសម្ពាធទាបបង្កឱ្យ​មាន​ភ្លៀង​ធ្លាក់​ក្នុង​កម្រិត​ពី​មធ្យមទៅបង្គួរស្ទើរជារៀងរាល់ថ្ងៃ៕