ប្រធានបុគ្គលិករបស់លោកប្រធានាធិបតីអ៊ុយក្រែន Volodymyr Zelenskiy បាន​និយាយ​កាល​ពី​ថ្ងៃ​អង្គារ (០៥ ធ្នូ) ថាការពន្យារពេលជំនួយរបស់សហរដ្ឋអាមេរិក សម្រាប់ទីក្រុងគីវ ដែល​កំពុង​ត្រូវ​បាន​ពិភាក្សានៅក្នុងសភានឹងបង្កើត «ហានិភ័យដ៏ធំធេង» សម្រាប់អ៊ុ​យក្រែន​ក្នុង​ការ​ចាញ់​សង្គ្រាម​ជា​មួយ​រុស្ស៊ី។

ការលើកឡើងរបស់ លោក អាន់ឌ្រី យើម៉ាក (Andriy Yermak) គឺមានភាព​ស្មោះត្រង់​បំផុត​ពី​មន្ត្រី​ជាន់ខ្ពស់​របស់ទីក្រុងគីវ ខណៈដែលភាព​មិន​ប្រាកដ​ប្រជា​បាន​វិល​ជុំវិញ​អនាគត​នៃ​កញ្ចប់​ជំនួយ​សំខាន់ៗរបស់សហរដ្ឋអាមេរិក និងសហភាពអឺរ៉ុប នៅពេលសង្រ្គាម​អ៊ុយក្រែន​ជា​មួយ​រុស្ស៊ី​បាន​ផ្ទុះឡើង។

លោក យើម៉ាក បានថ្លែងទៅកាន់ទស្សនិកជនជាភាសាអង់គ្លេសថា៖ ប្រសិនបើជំនួយ​ត្រូវ​បាន​ពន្យា​រ​ពេល «វាផ្តល់ហានិភ័យយ៉ាងខ្លាំងដែលយើងមិនអាចបន្តសម្រុកទៅមុខបានទៀតទេ ហើយ​នឹង​ស្ថិត​នៅចំណុចដដែលដូចពេលនេះ»។

កាលពីថ្ងៃច័ន្ទ ក្រុមមន្ត្រីសេតវិមានបាននិយាយថា សហរដ្ឋអាមេរិកកំពុងអស់ពេលវេលា និង​អស់​ថវិកា​ដើម្បី​ជួយ​អ៊ុយក្រែន ប្រយុទ្ធនឹងសង្រ្គាមរបស់ខ្លួនប្រឆាំងនឹងរុស្ស៊ី។

រដ្ឋបាលរបស់​លោកប្រធានាធិបតី ចូ បៃដិន (Joe Biden) បានស្នើសុំសភាកាលពីខែតុលា សម្រាប់ថវិកាជិត ១០៦ពាន់លានដុល្លារ ដើម្បីផ្តល់មូល​និធិ​ដល់​ផែន​ការ​ប្រកប​ដោយ​មហិច្ឆិតា​ សម្រាប់​សន្តិសុខ​ព្រំដែន​អ៊ុយក្រែន អ៊ីស្រាអែល និងសហរដ្ឋអាមេរិក ប៉ុន្តែសមាជិកបក្ស​សាធារណរដ្ឋ​ដែលគ្រប់គ្រងសភាដោយសំឡេងភាគច្រើន បានបដិសេធកញ្ចប់ថវិកានេះ៕