អ៊ីស្រាអែល ត្រូវធ្វើបន្ថែមទៀតដើម្បីអនុញ្ញាតឱ្យមានប្រេងឥន្ធនៈនិងជំនួយផ្សេងទៀតចូលទៅក្នុងតំបន់ហ្កាហ្សា ខណៈការវាយលុករបស់អ៊ីស្រាអែល ប្រឆាំងនឹងក្រុមហាម៉ាស នៅភាគខាងត្បូងនៃតំបន់ហ៊ុមព័ទ្ធប៉ាឡេស្ទីនមួយនេះកាន់តែខ្លាំងក្លាឡើង។

អ្នកនាំពាក្យក្រសួងការបរទេសអាមេរិក លោក ម៉ាធូ មីលឡឺ (Matthew Miller) បាននិយាយនៅក្នុងសន្និសីទសារព័ត៌មានមួយថា «កម្រិតនៃជំនួយដែលបានទទួលគឺមិនគ្រប់គ្រាន់ទេ ជំនួយត្រូវតែកើនឡើងបន្ថែមទៀត ហើយយើងបានបញ្ជាក់យ៉ាងច្បាស់ដល់រដ្ឋាភិបាលអ៊ីស្រាអែល»។

អង្គការសហប្រជាជាតិបាននិយាយថា កាលពីថ្ងៃច័ន្ទ រថយន្តជំនួយមនុស្សធម៌ចំនួន ១០០គ្រឿង និងប្រេងឥន្ធនៈប្រហែល ៦៩.០០០លីត្រត្រូវបានបញ្ជូនទៅហ្កាហ្សាពីប្រទេសអេហ្ស៊ីប ដែលជាចំនួនប្រហែលគ្នាកាលពីថ្ងៃអាទិត្យ។

អ្នកនាំពាក្យអង្គការសហប្រជាជាតិ លោក ស្តេហ្វាន ឌូហារីក (Stephane Dujarric) បានប្រាប់អ្នកយកព័ត៌មានកាលពីថ្ងៃអង្គារថា «តួលេខនេះគឺទាបជាងជាមធ្យមប្រចាំថ្ងៃនៃរថយន្តដឹកទំនិញចំនួន ១៧០គ្រឿង និងប្រេងឥន្ធនៈ ១១០.០០០លីត្រ ដែលបានចូលក្នុងអំឡុងពេលផ្អាកប្រយុទ្ធមនុស្សធម៌ ដែលបានកើតឡើងរវាងថ្ងៃទី២៤ និងថ្ងៃទី៣០ ខែវិច្ឆិកា»។

កាលពីសប្តាហ៍មុន រដ្ឋមន្ត្រីការបរទេសអាមេរិក លោក Antony Blinken ក្នុងដំណើរទស្សនកិច្ចលើកទីបីរបស់ខ្លួនទៅកាន់មជ្ឈិមបូព៌ា ចាប់តាំងពីការវាយប្រហាររបស់ពួកហាម៉ាស លើអ៊ីស្រាអែល ពីតំបន់ហ្កាហ្សា កាលពីថ្ងៃទី៧ ខែតុលា មកបានជំរុញឱ្យរដ្ឋាភិបាលអ៊ីស្រាអែលបង្កើនលំហូរជំនួយ និងកាត់បន្ថយការបង្កគ្រោះថ្នាក់ដល់ជនស៊ីវិលក្នុងការវាយលុកប្រឆាំងនឹងក្រុមហាម៉ាស៕