ភ្នំពេញ៖ ឯកឧត្ដមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានទទួលជួបលោកជំទាវ Teo Lay Cheng អគ្គរដ្ឋទូតប្រចាំព្រះកម្ពុជាដែលទើបតែងតាំងថ្មី នៅទីស្តីការក្រសួង នាព្រឹកថ្ងៃទី១៥ មិថុនា ឆ្នាំ២០២១នេះ ដើម្បីពិភាក្សាគ្នាអំពីការពង្រឹងភាពកិច្ចជាដៃគូបន្ថែមទៀត វាងវិស័យការងាររបស់ប្រទេសទាំងពីរ។
ឯកឧត្ដម ងុយ រិទ្ធ អនុរដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ប្រាប់ទូរទស្សន៍ព័ត៌មាន ប៊ីធីវី នៅក្នុងជំនួបថ្ងៃនេះឯកឧត្ដមរដ្ឋមន្ត្រី បានជម្រាបជូនភាគីសិង្ហបុរីថា ចំពោះការបញ្ជូនពលការិនីខ្មែរទៅធ្វើការនៅ សិង្ហបុរី នៅពុំទាន់មានកិច្ចព្រមព្រៀង ឬអនុស្សរណៈនៃការយោគយល់គ្នានៅឡើយទេ ដែលនាំឲ្យមានការលំបាកក្នុងការគ្រប់គ្រងទិន្នន័យការការពារស្របច្បាប់ និងការស្វែងរកកិច្ចសហការនានា។
ឯកឧត្ដម បានស្នើដល់ភាគីសិង្ហបុរី ពិចារណាបង្កើតឱ្យមានកិច្ចព្រមព្រៀងស្តីពី ការបញ្ជូនពលករជា មួយរាជរដ្ឋាភិបាលកម្ពុជា និងអនុញ្ញាតឱ្យមានការបញ្ជូនពលករទូទៅបន្ថែម ក្រៅពីពលការិនី ជំនួយការមេផ្ទះ។
ឯកឧត្តម ងុយ រិទ្ធ បានបញ្ជាក់ទៀតថា ចំពោះសំណើរបស់ឯកឧត្តមរដ្ឋមន្ត្រី ក្នុងកិច្ចសហប្រតិបត្តិការ លើវិស័យបណ្តុះបណ្តាលបច្ចេកទេស និងវិជ្ជាជីវៈ រួមនឹងកិច្ចព្រមព្រៀង ឬអនុស្សរណៈនៃការយោគយល់គ្នា រវាងប្រទេសទាំងពីរ លោកជំទាវអគ្គរដ្ឋទូតសម្តែងការរីករាយ និងពេញចិត្តបន្តកិច្ចសហការភាពជាដៃគូជាមួយ រដ្ឋាភិបាលកម្ពុជាឲ្យកាន់តែល្អប្រសើរបន្តទៀត និងបានវាយតម្លៃខ្ពស់ចំពោះការខិតខំប្រឹងប្រែងរបស់រដ្ឋាភិបាល កម្ពុជា ដែលបានជម្នះឧបសគ្គគ្រប់បែបយ៉ាង ក្នុងការចូលរួមស្តារ និងកសាងប្រទេសជាតិឲ្យមានការអភិវឌ្ឍរីក ចម្រើនជាលំដាប់។
តាមរយៈជំនួបថ្ងៃនេះដែរ ធ្វើឡើងស្របពេលដែលកម្ពុជាកំពុងប្រារព្ធទិវាជាតិអប់រំបណ្ដុះបណ្ដាល និងវិជ្ជាជីវៈ លើកទី៤ ឆ្នាំ២០២១ ក្រោមប្រធានបទ «ធីវ៉េត ធ្វើឲ្យជំនាញកាន់តែប្រសើរ និងប្រាក់ចំណូលខ្ពស់» ជាមួយគ្នានេះ ភាគីសិង្ហបុរី ក៏បានចូលរួមសម្តែងការអបអរសាទរជាមួយរដ្ឋាភិបាលកម្ពុជា ក៏ដូចជាឯកឧត្ដមរដ្ឋមន្ត្រីនៅក្នុង ការប្រារព្ធទិវានេះផងដែរ ខណៈដែលកម្ពុជា-សិង្ហបុរី បានអនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការលើវិស័យ ធីវ៉េត តាំងពីឆ្នាំ២០១៩មកម្ល៉េះ៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
