គណៈកម្មាធិការសិទ្ធិមនុស្សកម្ពុជា (CHRC) បានរៀបចំសិក្ខាសាលពិគ្រោះយោបល់ថ្នាក់ជាតិ សម្រាប់​ការ​ពិនិត្យជាសកលតាមកាលកំណត់ UPR ដើម្បីឲ្យភាគីទាំងអស់ផ្តល់មតិ និង​ធាតុ​ចូល​មុ​ន​បញ្ជូន​ទៅអង្គការសហប្រជាជាតិ។

ឯកឧត្តមទេសរដ្ឋមន្រ្តី កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា នៅថ្ងៃទី៦ ខែធ្នូនេះ​បាន​អញ្ជើញជា​អធិបតីសិក្ខាសាលពិគ្រោះយោបល់ថ្នាក់ជាតិសម្រាប់ការពិនិត្យជាសកល តាម​កាល​កំណត់ UPR ជុំទី៤ ដោយមានចូលរួមពីបណ្តាក្រសួង/ស្ថាប័នរដ្ឋ អង្គការដៃគូ និងអង្គការ​សង្គម​ស៊ីវិល​ជាច្រើននាក់។

ក្នុងសិក្ខាសាលានេះឯកឧត្តម កែវ រ៉េមី មានប្រសាសន៍ថា សិក្ខាសាលា​នេះ​រៀប​ចំ​ឡើង​ក្រោម​កិច្ច​សហប្រតិបត្តិការ​រវាងគណៈកម្មាធិការសិទ្ធិមនុស្សកម្ពុជា និងការិយាល័យ​ឧត្តម​ស្នង​ការ​អង្គការ​សហប្រជាជាតិទទួលបន្ទុកសិទ្ធិមនុស្សប្រចាំកម្ពុជា (OHCHR) ក្នុងគោល​បំណង​ផ្តល់​ជា​វេទិកា​មួយ​សម្រាប់​ឱ្យភាគីទាំងអស់ ក្នុងការផ្តល់មតិយោបល់ ឬធាតុចូលផ្សេងៗទៅ លើ​សេចក្តី​ព្រាង​របាយការណ៍ UPR ជុំទី៤ របស់កម្ពុជា និងដើម្បីឱ្យមានអនុលោមភាពជាមួយនឹងសេចក្តី សម្រេច​របស់​ក្រុម​ប្រឹក្សាសិទ្ធិមនុស្ស ដែលលើកទឹកចិត្តឱ្យមានការពិគ្រោះយោបល់ឱ្យបានទូលំទូលាយ។

ឯកឧត្តមបញ្ជាក់ថា ការពិនិត្យឡើងវិញជាសកលតាមកាលកំណត់ គឺជាយន្តការសិទ្ធិមនុស្សតែមួយគត់របស់ក្រុមប្រឹក្សាសិទ្ធិមនុស្សអង្គការសហប្រជាជាតិ ដែល​មាន​ការ​ចូលរួ​ម​ពីប្រទេសជាសមាជិកអង្គការសហប្រជាជាតិទាំង ១៩៣ ប្រទេស និងធ្វើឡើងរៀងរាល់ ចន្លោះពី៤ឆ្នាំកន្លះទៅ៥ឆ្នាំម្ដង។ យន្តការនេះ មានគោល​បំណង​ធ្វើ​ឱ្យ​ប្រសើរ​ឡើង​នូវ​ស្ថាន​ភាព​សិទ្ធិ មនុស្សនៅក្នុងប្រទេសទាំងអស់ តាមរយៈការចែករំលែកឧត្តមានុវត្ត និងកា​រ​ផ្តល់​ជំនួយ​បច្ចេក​ទេសរវាងរដ្ឋនានា និងដៃគូផ្សេងៗទៀត ហើយក៏ដើម្បី​ធានា​ថា​ស្ថាន​ភាព​សិទ្ធិ​មនុស្ស​ក្នុង​ប្រទេសទាំងអស់ត្រូវបានលើកយកមកជជែកពិភាក្សានៅចំពោះមុខរដ្ឋដទៃទៀតដោយស្មើៗគ្នា។

សូម​ជម្រាបថា របាយការណ៍ UPR ជុំទី៤នេះ នឹងត្រូវ​បញ្ជូន​ទៅ​ក្រុម​ប្រឹក្សា​សិទ្ធិ​មនុស្ស​នៅ​ចុ​ង​ខែ​មករា​ ឆ្នាំ២០២៤ និងត្រូវពិនិត្យនៅក្នុងសម័យប្រជុំលើទី ៤៦ របស់ក្រុមការងារ UPR នៃក្រុម​ប្រឹក្សា​សិទ្ធិមនុស្ស ចន្លោះពីថ្ងៃទី២៩ ខែមេសា ដល់ថ្ងៃទី១០ ខែឧសភា ឆ្នាំ២០២៤៕ អត្ថបទ សេក ឧត្តម