រាជរដ្ឋាភិបាលកម្ពុជា ក្នុងឆ្នាំ ២០២៤ ខាងមុខនឹងចាប់ផ្ដើមការបើកសាច់ប្រាក់ ជូន​ពលរដ្ឋគោលដៅ​ដែល​នឹងទទួលផលពីកម្មវិធី «កញ្ចប់គ្រួសារ» ខណៈតាមការប៉ាន់​ប្រមាណ​ក្នុង​ឆ្នាំ​ដំបូង​នេះ រាជរដ្ឋាភិបាលនឹងចំណាយប្រមាណ ១៦៥ លានដុល្លារ លើការអនុវត្តកម្មវិធី «កញ្ចប់​គ្រួសារ»នេះ។ នេះបើតាមឯកឧត្តម ស៊ឹម សុធន ប្រតិភូ​រាជរដ្ឋាភិបាល​ទទួល​បន្ទុក​ជា​អគ្គនាយក​មូលនិធិជាតិជំនួយសង្គម។

សម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានមានប្រសាសន៍ថា រាជរដ្ឋាភិបាល​កម្ពុជា​នឹង​ចាប់​ផ្ដើម​អនុវត្តកម្មវិធី «កញ្ចប់គ្រួសារ» ពីខែមេសា ឆ្នាំ ២០២៤។ កម្មវិធីនេះជា​កម្ម​វិធី​ទម្រ​ដែល​នៅ​តែ​ផ្តោតសំខាន់ជួយដល់គ្រួសារក្រីក្រមានបណ្ណសមធម៌ ហើយត្រូវ​អនុវត្ត​ជំនួស​កម្មវិធី​ឧបត្ថម្ភ​សាច់​ប្រាក់ជូនគ្រួសារក្រីក្រ និងងាយរងគ្រោះកំឡុងពេលប្រយុទ្ធប្រឆាំងកូវីដ-១៩ ដែល​រដ្ឋាភិបាលដាក់អនុវត្តតាំងពីខែ មិថុនា ឆ្នាំ ២០២០មកម្លេះ។ កម្មវិធី«កញ្ចប់គ្រួសារ» ជា​កម្ម​វិធី​មាន​លក្ខណៈ​អចិន្ត្រៃយ៍ ខណៈកម្មវិធីឧបត្ថម្ភសាច់ប្រាក់ជូនគ្រួសារក្រីក្រកំឡុងពេលវិបត្តកូវីដ-១៩ គឺជាកម្មវិធី បណ្ដោះអាសន្នតែប៉ុណ្ណោះ។

ឯកឧត្តម ស៊ឹម សុធន លើកឡើងថា ការអនុវត្តកម្មវិធីក្នុងឆ្នាំ ២០២៤ ជាឆ្នាំដំបូង​ដែល​ចាប់​ផ្ដើម​បើក​ថវិកាចាប់ពីខែ មេសា ឆ្នាំក្រោយនោះ គឺរាជរដ្ឋាភិបាលគ្រោងចំណាយប្រមាណ ១៦៥ លាន​ដុល្លារ សម្រាប់ក្រុមគោលដៅជា ជនមានពិការភាព មនុស្សវ័យចាស់ចាប់ពី ៦០ឆ្នាំឡើងទៅ ក៏​ដូចជាសិស្សសិក្សាពីថ្នាក់បឋមដល់ថ្នាក់មធ្យមមានការបើកសាច់ប្រាក់ប្រចាំខែ។ រីឯស្ត្រី​មាន​ផ្ទៃ​ពោះ និងកុមារអាយុក្រោម ២ឆ្នាំ ទទួលបានថវិកាដោយគោរពតាមលក្ខណ្ឌ នៅ​ពេល​ទទួល​សេវា​នៅ​មន្ទីរ​ពេទ្យរដ្ឋ ក្នុងពេលមុនសម្រាល ពេលសម្រាល និងក្រោយពេលសម្រាល។ រីឯចំនួនថវិកា ក៏​មានភាពផ្សេងគ្នា ទៅតាមក្រុមគោលដៅផងដែរ។

សូមបញ្ជាក់ថា កម្មវិធី «កញ្ចប់គ្រួសារ» ជាការធ្វើសមហរណកម្ម ៤កម្មវិធីរួមគ្នា។ កម្មវិធីទី ១ គឺ​កម្ម​វិធី​​ឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ឆ្នាំ។ កម្មវិធីទី ២ គឺ​កម្ម​វិធី​អាហា​រូបករណ៍សិស្សក្រីក្រថ្នាក់បឋម និងមធ្យម។ កម្មវិធីទី៣ គឺកម្មវិធី​ឧបត្ថម្ភ​សាច់​ប្រាក់​ជូន​ជន​មាន​ពិការ​ភាព និងកម្មវិធីទី ៤ គឺកម្មវិធីឧបត្ថម្ភសាច់ប្រាក់ជូនចាស់ជរាមានវ័យចាប់ពី ៦០​ឡើង​ទៅ​៕ អត្ថបទ៖ គឹមហុក