កណ្ដាល៖ ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានចូលរួមយុទ្ធនាការចាក់វ៉ាក់សាំងបង្ការជំងឺកូវីដ-19ក្នុងក្របខណ្ឌទូទាំងប្រទេស ប្រភេទស៊ីណូហ្វាមដូសទី១ ជូនប្រជាពលរដ្ឋក្នុងស្រុកអង្គស្នួល ខេត្តកណ្តាល។
បើតាមឯកឧត្តម លេង ផាលី ប្រធានប្រតិបតិ្តក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ប្រាប់ BTV ព័ត៌មាន នារសៀលថ្ងៃទី១៥ ខែមិថុនា ឆ្នាំ២០២១នេះថា ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានចុះយុទ្ធនាការចាក់វ៉ាក់សាំងបង្ការជំងឺកូវីដ-19 ក្នុងក្របខណ្ឌទូទាំងប្រទេស ចំនួន៤៣១នាក់ ក្នុងចំណោម១២៥៨នាក់ កំពុងតែដំណើរការចាក់វ៉ាក់សាំងកូវីដ-19។ ក្នុងនោះកម្លាំងក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ចំនួន១៥ក្រុម ស្មើនឹង១៥០រូប បានបំពេញបេសកកម្មចាក់វ៉ាក់សាំងដូសទី២ នៅមណ្ឌលទាំង៣ នៃខណ្ឌ៧មករា ដោយរលូន។ ក្រៅពីនោះកម្លាំងគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចំនួន៧ក្រុម ស្មើនឹង៧០រូប បានបំពេញបេសកកម្មចាក់វ៉ាក់សាំងដូសទី១ ចាប់ពីថ្ងៃទី១០ ខែមិថុនា ដល់ថ្ងៃទី២៣ ខែមិថុនា ឆ្នាំ២០២១ និងដូសទី២ ចាប់ពីថ្ងៃទី២៥ ខែមិថុនា រហូតដល់ថ្ងៃទី៨ ខែកក្កដា ឆ្នាំ២០២១ នៅមណ្ឌលទាំង៤ នៃខណ្ឌព្រែកព្នៅ។ ដោយឡែកនៅក្នុងមូលដ្ឋានខេត្តកណ្តាល កម្លាំងជំនាញរបស់ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចំនួន១៤០រូប ស្មើនឹង១៤ក្រុម កំពុងតែដំណើរការចាក់វ៉ាក់សាំងបង្ការជំងឺកូវីដ-១៩ ដូសទី១ ប្រភេទស៊ីណូហ្វាម ជូនប្រជាពលរដ្ឋនៅមណ្ឌលទាំង៥ ក្នុងស្រុកអង្គស្នួល។ សកម្មភាពខាងលើនេះ យើងមានប្រធានក្រុមសម្របសម្រួល១៨រូប បានដឹកនាំ ជំនួយការសម្របសម្រួល៥៣រូប ចុះសម្របសម្រួលការងារនៅតាមមណ្ឌល នៃខណ្ឌទាំង២ ក្នុងរាជធានីភ្នំពេញ និងស្រុកអង្គស្នួល ខេត្តកណ្តាលផងដែរ។
ទន្ទឹមគ្នានោះដែរឯកឧត្តម វេជ្ជបណ្ឌិត ឌឿន វុទ្ធា អនុប្រធានប្រតិបត្តិក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានឲ្យដឹងថា នៅក្នុងមណ្ឌលចាក់វ៉ាក់សាំងកូវីដ-19 សមាគមខ្មែរ-ចិន ថ្នល់ទទឹង មានក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចំនួន៣ក្រុម ស្មើ៣០រូប ដោយបែងចែកក្នុង១ក្រុម មានគ្រូពេទ្យចំនួន១០រូប ជាអ្នកជំនាញក្នុងការរៀបចំចាត់ចែងចាក់វ៉ាក់សាំង និងមានក្រុមសម្របសម្រួលចំនួន១៨នាក់។ សម្រាប់យុទ្ធនាការចាក់វ៉ាក់សាំងបង្ការជំងឺកូវីដ-១៩ដូសទី១ ប្រភេទស៊ីណូហ្វាម បានចាប់ផ្តើមពីថ្ងៃទី១៤ ខែមិថុនា រហូតដល់ថ្ងៃទី២៧ ខែមិថុនា ឆ្នាំ២០២១ និងដូសទី២ ចាប់ពីថ្ងៃទី២៨ ខែមិថុនា រហូតដល់ថ្ងៃទី១១ ខែកក្កដា ឆ្នាំ២០២១។
ជាមួយគ្នានោះដែរ ប្រជាពលរដ្ឋ ចាស់ជរា យុវជនរស់នៅក្នុងមូលដ្ឋានស្រុកអង្គស្នួល មកទទួលការចាក់វ៉ាក់សាំងបង្ការជំងឺកូវីដ-១៩ ពីក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បាននិយាយរួមគ្នាថា នៅពេលបានចាក់វ៉ាក់សាំងកូវីដ-១៩នៅព្រឹកនេះ បានធ្វើឲ្យគាត់សប្បាយអរជាខ្លាំង ស្ទើស្រក់ទឹកភ្នែក និងរកអ្វីមកនិយាយ ប្រៀបផ្ទឹមបាននោះទេ គឺមានតែសូមថ្លែងអំណរគុណជាខ្លាំង ជូនចំពោះសម្តេចតេជោ ហ៊ុន សែន និងសម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ក៏ដូចជាក្រសួងសុខាភិបាល និងក្រុមការងារគ្រូពេទ្យជួរមុខទាំងអស់ បានចាក់វ៉ាក់សាំងជូនពួកគាត់ ដើម្បីប្រយុទ្ធប្រឆាំងនឹងជំងឺកូវីដ-១៩។
ជាចុងក្រោយឯកឧត្តម លេង ផាលី បានបញ្ជាក់ទៀតថា ក្រោមការចង្អុលបង្ហាញរបស់ឯកឧត្តម ហ៊ុន ម៉ានី ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី និងដោយទទួលបានការឧទ្ទេសនាមពីលោកជំទាវ វេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្របខណ្ឌទូទាំងប្រទេស នាពេលបច្ចុប្បន្ននេះ បានចូលរួមយុទ្ធនាការចាក់វ៉ាក់សាំងបង្ការជំងឺកូវីដ១៩ ក្នុងក្របខណ្ឌទូទាំងប្រទេស។ ហើយក៏បានអំពាវនាវបងប្អូនប្រជាពលរដ្ឋទាំងអស់ សូមកុំជឿតាមការញុះញ៉ុងរបស់ជនអគតិមួយចំនួន ដែលអង្គុយចាំតែមើល រួចមិនធ្វើអ្វីទាល់តែសោះ។ ដូច្នេះសូមបងប្អូនប្រជាពលរដ្ឋ ដែលដល់វេនទទួលការចាក់វ៉ាក់សាំងបង្ការជំងឺកូវីដ-១៩ ទាំងបីប្រភេទ ដូចជាស៊ីណូហ្វាម ស៊ីណូវ៉ាក់ និងអាស្ត្រាហ្សេនីកា សូមអញ្ជើញទៅចាក់វ៉ាក់សាំងឱ្យបានគ្រប់ៗគ្នា និងសូមឱ្យមានការជឿជាក់លើការដឹកនាំរបស់សម្តេចអគ្គមហាសេនាបតីតេជោ ហ៊ុន សែន ដែលបានលះបង់ទាំងកម្លាំងកាយ កម្លាំងចិត្ត មិនខ្លាចការនឿយហត់ ដើម្បីសេចកី្តសុខទុក្ខប្រជាពលរដ្ឋទូទាំងប្រទេស៕ អត្ថបទ៖ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
