បណ្ណាល័យជាតិកម្ពុជានៃក្រសួងវប្បធម៌ និងវិចិត្រសិល្បៈ និងក្រសួងអប់រំ យុវជន និងកីឡា នឹង​រៀបចំ​ពិព័រណ៍សៀវភៅកម្ពុជាលើកទី១០ ក្រោមប្រធានបទ «សរសេរចំណាន អានចំណាប់ ចាប់​យក​ចំណេះ» ដែលនឹងប្រព្រឹត្តទៅរយៈពេល ៤ថ្ងៃ ចាប់ពីថ្ងៃទី១៤ ដល់១៧ ខែធ្នូ ឆ្នាំ២០២៣ ខាង​មុខនៅសួនច្បារខាងមុខសាលាបុរីកោះពេជ្រ។

នៅក្នុងសន្និសីទសារព័ត៌មានពាក់ព័ន្ធការគ្រោងរៀបចំពិព័រណ៍សៀវភៅកម្ពុជា នៅព្រឹកថ្ងៃទី៦ ខែ​ធ្នូ​នេះ លោកជំទាវ ឡងឌី សាន់ណារ៉ា រដ្ឋលេខាធិការក្រសួងវប្បធម៌ និងវិចិត្រសិល្បៈ បាន​មាន​ប្រសាសន៍​ថា ការរៀបចំកម្មពិព័រណ៌នេះក្នុងគោលបំណងសំខាន់លើកស្ទួយដល់ការអាន និង​ការ​សរសេរ ព្រមទាំងលើកស្ទួយឧស្សាហ៍កម្មសៀវភៅដោយធ្វើយ៉ាងណាឱ្យអ្នកសរសេរ រោងបោះ​ពុម្ព​សៀវភៅ អាចមានឱកាសធ្វើអាជីវកម្មលក់សៀវភៅផងដែរ។

លោក ហុក សិទ្ធិ ប្រធានសមាគមបណ្ណារក្ស និងឯកសារវិទូរកម្ពុជា និងនាយកអង្គការស៊ីប៉ា ថ្លែង​ថា ពិព័រណ៍សៀវភៅនេះ មានស្តង់ចំនួនប្រមាណជិត ៣០០ស្តង់ ដែលមាន​ការ​ចូលរួម​ពី​គ្រឹះ​ស្ថាន​បោះពុម្ព​ផ្សាយ និងអ្នកនិពន្ធល្បីៗជាច្រើនរហូតដល់ ១៥២ស្ថាប័ន។

លោកស្រី ខ្លូត វិបុលឡា ប្រធានបណ្ណាល័យជាតិកម្ពុជា បានឲ្យដឹងថា សម្រាប់​សៀវភៅ​ដែល​នឹង​ត្រូវ​ដាក់​តាំងបង្ហាញលក់ មានចំនួនប្រមាណ ១សែនក្បាល លើប្រភេទខុសៗគ្នា មានដូចជា សៀវភៅ​បែបប្រលោមលោក សៀវភៅទស្សនវិជ្ជានិងចិត្តវិទ្យា សៀវភៅសម្រាប់កុមារ សៀវភៅ​ប្រវត្តិវិទ្យា និងភូមិវិទ្យា សៀវភៅទាក់ទងនឹងសាសនានិងសិល្បៈជាដើម រួមមានទាំងភាសាខ្មែរ និង​ភាសាបរទេស។ លោកស្រីរំពឹងទៀតថា នៅឆ្នាំនេះ ពិព័រណ៍​សៀវភៅ​នឹង​អាច​ទាក់​ទាញ​អ្នក​ចូលរួម​ទស្សនាប្រហែល ១៨ម៉ឺននាក់។

សូមបញ្ជាក់ថា កម្មវិធីពិព័រណ៍សៀវភៅកម្ពុជាលើកទី១០ ក្រៅពីការ​ដាក់​តាំង​បង្ហាញ​លក់​សៀវភៅ​នានា ក៏នឹងមានរៀបចំសកម្មភាពលេងល្បែងកំសាន្តជាមួយនឹងអ្នកចូលរួមដើម្បីឈ្នះរង្វាន់ផ្សេងៗ ការ​ប្រគំតន្ត្រី ដែលចូលរួមសម្តែងដោយតារាចម្រៀងល្បីៗជាដើមផងដែរ៕ អត្ថបទ៖ ឈិត បូរ៉ាវី