សហភាពសហព័ន្ធយុវជនកម្ពុជា (ស.ស.យ.ក) និងធនាគារ វីង កាលពីថ្ងៃទី៥ ខែធ្នូនេះ បានចុះហត្ថលេខាលើអនុស្សរណៈនៃការយោគយល់គ្នា ដើម្បីជួយសម្រួលទៅដល់សមាជិកយុវជនរបស់ខ្លួនអាចទទួលបានចំណេះដឹងផ្នែកហិរញ្ញវត្ថុដើម្បីបង្កើនជីវភាពរស់នៅប្រចាំថ្ងៃ តាមរយៈការទទួលយកបទពិសោធន៍នៃដំណោះស្រាយធនាគារឌីជីថល ក៏ដូចជាចូលរួមបង្កើតគំនិតផ្តួចផ្តើមថ្មីៗជាច្រើនទៀត។
នៅពិធីចុះអនុស្សរណៈយោគយល់គ្នានេះ ឯកឧត្តម ហ៊ុន ម៉ានី ប្រធាន ស.ស.យ.ក មានប្រសាសន៍ថា ភាពជាដៃគូជាមួយធនាគារ វីង នាពេលនេះ គឺជាការឆ្លុះបញ្ចាំងពីការតាំងចិត្តឥតឈប់ឈរក្នុងការជំរុញដល់សក្តានុពលរបស់យុវជនកម្ពុជា។ តាមរយៈកិច្ចសហការនេះភាគីទាំងពីរនឹងផ្តល់ឲ្យសមាជិកនូវចំណេះដឹង និងប្រភពនៃការយល់ដឹងពីការគ្រប់គ្រងហិរញ្ញវត្ថុ ក៏ដូចជាដំណើរឆ្ពោះទៅសម្រេចគោលដៅអនាគតរបស់ពួកគេ។
ឯកឧត្តមថ្លែងថា អនុស្សរណៈនេះមានគោលបំណងសិក្សាស្វែងរកឱកាសក្នុងការផ្តល់ការបណ្តុះបណ្តាលចំណេះដឹងផ្នែកហិរញ្ញវត្ថុទៅដល់សមាជិក ស.ស.យ.ក ការជួយសម្របសម្រួលកម្មសិក្សានៅធនាគារវីង ព្រមទាំងអនុវត្តគំនិតផ្តួចផ្តើមដើម្បីជួយទៅដល់យុវជនជាច្រើនផ្សេងទៀត។
ក្នុងពិធីដដែលនេះអ្នកឧកញ៉ា គិត ម៉េង ប្រធានក្រុមប្រឹក្សាភិបាលធនាគារ វីង មានប្រសាសន៍ថា អនុស្សរណៈនេះបង្ហាញពីការប្តេជ្ញាចិត្តវីង ក្នុងការជំរុញឲ្យមានបរិយាបន្នហិរញ្ញវត្ថុ និងជួយពង្រឹងសមត្ថភាពទៅដល់យុវជនកម្ពុជាផងដែរ។ ធនាគារវីង មានទំនុកចិត្តថា តាមរយៈគំនិតផ្តួចផ្តើមរួមគ្នានាពេលនេះនឹងរួមចំណែកក្នុងការកសាងយុជនជំនាន់ថ្មីមួយ ដែលពោរពេញទៅដោយចំណេះដឹងផ្នែកហិរញ្ញវត្ថុហើយថែមទាំងមានសមត្ថភាពរឹងមាំ។
សូមជម្រាបថា កិច្ចសហការរវាងធនាគារ វីង និងស.ស.យ.ក គឺជាកម្លាំងសាមគ្គីនាដោយឈរលើចក្ខុវិស័យរួម តាមរយៈការប្រើប្រាស់ជំនាញការនៃស្ថាប័នទាំងពីរ ដើម្បីជួយអភិវឌ្ឍន៍សហគមន៍ឲ្យបានកាន់តែប្រសើរឡើង។ ស.ស.យ.ក មានការប្តេជ្ញាចិត្តក្នុងការបំពាក់បំប៉នយុវជនកម្ពុជានូវចំណេះដឹង និងជំនាញចាំបាច់នានា ដើម្បីក្លាយជាសសរស្តម្ភរបស់ប្រទេសជាតិ ក្នុងការជួយរក្សានិរន្តរភាពសមិទ្ធផលកន្លងមក និងជំរុញការអភិវឌ្ឍសេដ្ឋកិច្ចសង្គមនាពេលអនាគត៕ អត្ថបទ៖ គឹមហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
