ប្រធានគណបក្សឯកភាពជាតិខ្មែរ លោក អ៊ុន ជឹម បានថ្លែងថា ឧត្តមក្រុមប្រឹក្សាពិគ្រោះ និងផ្តល់​យោបល់ បង្កើតឡើងជាការប្រមូលធាតុចូល​នៃទស្សនៈពហុគំនិតមួយ​ដើម្បី​រួមគ្នា​ស្ថាបនា​ជាតិ និង​ដើម្បីគុណប្រយោជន៍សម្រាប់ប្រជាជន និងប្រទេសជាតិទាំងមូល ហើយ​គណបក្ស​ឯកភាព​ជាតិ​​ខ្មែរសូមប្តេជ្ញាចិត្តយ៉ាង មោះមុតធ្វើកិច្ច​ការងារ​នេះ​ជាមួយ​រាជ​រដ្ឋាភិបាល​ឲ្យ​កាន់​តែ​ល្អប្រសើរ​ឡើងថែមទៀត។

ថ្លែងនៅក្នុងឱកាសចូលរួមកិច្ចប្រជុំលើកដំបូង នៃឧត្តមក្រុមប្រឹក្សាពិគ្រោះ និងផ្ដល់យោបល់ ដែល​ដឹកនាំ​ដោយសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នាព្រឹកថ្ងៃទី៦ ខែធ្នូ ឆ្នាំ​២០២៣​នេះ នៅវិមានសន្តិភាព លោក អ៊ុន ជឹម បានលើកឡើងថា ឧត្តម​ក្រុម​ប្រឹក្សា​ពិគ្រោះ និង​ផ្តល់​យោបល់នេះ គឺបានបង្កើតឡើងក្រោមការផ្តួចផ្តើមប្រកបដោយ គតិបណ្ឌិត​របស់​សម្តេច​អគ្គ​មហា​សេនាបតីតេជោ ហ៊ុន សែន អតីតនាយករដ្ឋមន្រ្តី នៃ​កម្ពុជា​នៅ​ក្នុង​អាណត្តិទី៦ កន្លង​ទៅ​ហើយសម្រាប់​អាណត្តិទី៧នេះបន្តដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃ​កម្ពុជា ដោយសម្តេចមានចក្ខុវិស័យវែងឆ្ងាយ ច្បាស់លាស់ ដោយ​មើល​ឃើញ​ថា«ឧត្តមក្រុមប្រឹក្សាពិគ្រោះ និងផ្តល់យោបល់នេះ ជាការប្រមូល​ធាតុចូល​នៃ​ទស្សនៈ​ពហុគំនិត​រួមមួយ​ដ៏​មានសារសំខាន់សម្រាប់ជាប្រយោជន៍ដល់ការស្ថាបនាជាតិ និងជាសេនានុយោមួយ សម្រាប់​ជួយតាមដានដល់ការអនុវត្ត របស់មន្រ្តីថ្នាក់ជាតិ និងថ្នាក់ក្រោមជាតិ ដែល​ប្រព្រឹត្ត​ខុស​ឆ្គង ឬអសកម្មការងារក្នុងការបម្រើប្រជាជន ឲ្យបានល្អជាដើម»។

នៅក្នុងកិច្ចប្រជុំនោះលោក អ៊ុន ជឹម ក៏បានលើកឡើងផងដែរថា គណបក្សឯកភាពជាតិខ្មែររបស់ លោក សូមធ្វើការប្តេជ្ញា​ចិត្ត​ដ៏មោះមុត​ចូល​រួម​បំពេញ​កាតព្វកិច្ច​ដូច​មាន​ចែង​នៅ​ក្នុង​ជំពូ​ក​ទី​៤​មាត្រា​ទី៨-១៥ និងជំពូកដទៃ មាត្រាផ្សេងៗទៀតនៃច្បាប់ស្តីពីការរៀបចំ និងការប្រព្រឹត្ត​ទៅ​នៃ​ឧត្តម​ក្រុម​ប្រឹក្សាពិគ្រោះ និងផ្តល់យោបល់ និងចូលរួមពង្រឹងសាមគ្គីជាតិជាមួយរាជរដ្ឋាភិបាល ដើម្បីការពារឯករាជ្យជាតិ អធិបតេយ្យ និងបូរណភាពទឹកដី​ទប់ស្កាត់​នូវ​នយោបាយ​ជ្រុលនិ​យម​ដែល​នាំ​ឲ្យបែកបាក់សាមគ្គី និងគ្រោះថ្នាក់ដល់ជាតិ ដូចប្រវត្តិដ៏ជូចត់ធ្លាប់មានកន្លងមកនោះ។

លោកបានបន្ថែមទៀតថា ក្នុងនាមប្រធានគណបក្ស និងប្រធានប្រតិភូគណបក្សឯកភាពជាតិខ្មែរ សូមចូលរួមសហប្រតិបត្តិការជាមួយរាជរដ្ឋាភិបាល និងធ្វើកិច្ចសហប្រតិបត្តិការជាមួយ​សម្ព័ន្ធ​ភាព​រវាង បណ្តាគណបក្សនយោបាយនៅកម្ពុជា ដូចមានចែងនៅក្នុងកិច្ចព្រមព្រៀងទាំងអស់ចំណុច ដើម្បី​ជំរុញការអនុវត្តន៍នយោបាយ​បង្រួបបង្រួមជាតិឲ្យកាន់តែរឹងមាំ និងដើម្បីប្រមូល​កម្លាំង​ស្នេហា​ជាតិ​ចូលរួមថែរក្សា សន្តិភាព ស្ថិរភាពនយោបាយ សំដៅធានាឲ្យបានភាពសុខសាន្ត និងការ​អភិវឌ្ឍប្រទេសជារៀងរហូតជាដើម៕ អត្ថបទ៖ បាន ចក់