ភ្នំពេញ៖ សម្តេចតេជោ ហ៊ុន សែននាយករដ្ឋមន្ត្រីកម្ពុជា តាមរយៈគណៈកម្មការចំពោះកិច្ចការចាក់វ៉ាក់សាំងកូវីដ-19 ក្នុងក្របខណ្ឌទូទាំងប្រទេស នៅថ្ងៃទី១៥ខែមិថុនានេះ បន្តផ្តល់អំណោយថេបប្លេត និងសំភារៈវេជ្ជសាស្ត្រមួយចំនួនទៀត ជូនដល់ក្រុមគ្រូពេទ្យចាក់វ៉ាក់សាំងបង្ការជំងឺកូវីដ-19 ក្នុងរាជធានី-ខេត្តចំនួន៥។
គណៈកម្មការចំពោះកិច្ចការចាក់វ៉ាក់សាំងកូវីដ១៩ ក្នុងក្របខណ្ឌទូទាំងប្រទេស នៅថ្ងៃទី១៥ខែមិថុនានេះ បានប្រគល់ថេបប្លេត ជាអំណោយរបស់សម្តេចតេជោហ៊ុន សែននាយករដ្ឋមន្ត្រីកម្ពុជា និងសម្ភារៈវេជ្ជសាស្ត្រមួយចំនួនទៀត ជូនដល់ក្រុមគ្រូពេទ្យចាក់វ៉ាក់សាំង ក្នុងខេត្តចំនួន៥រួមមាន៖ខេត្តកែប កំពត កោះកុង ព្រះសីហនុ និងខេត្តតាកែវ។
ពិធីប្រគល់-ទទួលអំណោយទាំងអស់នេះ ធ្វើឡើងនៅខេត្តកែប ដែលមានការអញ្ជើញចូលរួមពីលោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចការចាក់វ៉ាក់សាំងកូវីដ-19 ក្នុងក្របខណ្ឌទូទាំងប្រទេស លោកស្រីជំទាវវេជ្ជបណ្ឌិតលី អាយលែនតំណាងអង្គការសុខភាពពិភពលោកប្រចាំកម្ពុជា ឯកឧត្តមសោម ពិសិដ្ឋអភិបាលខេត្តកែប និងមន្ទីរសុខាភិបាលខេត្តទាំង៥ចូលរួមផងដែរ។
ក្នុងឱកាសនោះ លោកជំទាវឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគ.វ.ក.១៩ បានមានប្រសាសន៍ថា អំណោយដែលសម្តេចតេជោហ៊ុន សែននាយរដ្ឋមន្ត្រីកម្ពុជា ផ្តល់ជូនដល់ក្រុមគ្រូពេទ្យចាក់វ៉ាក់សាំងនៅពេលនេះ បានរួមចំណែកយ៉ាងសំខាន់ក្នុងដំណើរចាក់វ៉ាក់សាំងកូវីដ-19 ខណៈការយុទ្ធនាការចាក់វ៉ាក់សាំងនឹងធ្វើតាមលំដាប់លំដោយ។
ក្រៅពីនេះ លោកជំទាវបានក្រើនរំលឹកដល់មូលដ្ឋានសុខាភិបាលសាធារះត្រូវបង្កើនការយកចិត្តទុកដាក់ទប់ស្កាត់ជំងឺកូវីដ-១៩ កុំឳ្យឆ្លងជំងឺកូវីដ-១៩។
ដើម្បីទប់ស្កាត់ការរីករាលដាលជំងឺកូវីដ-១៩ តាមរយៈយុទ្ធនាការចាក់វ៉ាក់សាំងកូវីដ-១៩ សម្តេចតេជោហ៊ុន សែននាយករដ្ឋមន្ត្រីកម្ពុជា បានផ្តល់អំណោយថេបប្លេត និងសំភារះវេជ្ជសាស្ត្រ មួយចំនួនទៀតដល់ក្រុមគ្រូពេទ្យចាក់វ៉ាក់សាំងក្នុងទូទាំងប្រទេស។
បើតាមឯកឧត្តមសោម ពិសិដ្ឋអភិបាលខេត្តកែប បានលើកឡើងដែរថា សំភារៈដែលទទួលបានពីសម្តេចតេជោ នឹងយកទៅប្រើប្រាស់ឱ្យចំគោលដៅ ក្នុងយុទ្ធនាការចាក់វ៉ាក់សាំងកូវីដ-19។
ការចាក់វ៉ាក់សាំងកូវីដ-19 គឺជាមធ្យោបាយមួយ ក្នុងចំណោមវិធានការសុខាភិបាលចាំបាច់ដទៃទៀត ដែលនឹងបង្ការការរាតត្បាត ការចម្លងជំងឺកូវីដ-19 និងកាត់បន្ថយផលប៉ះពាល់នៃជំងឺកូវីដ-19 ទៅលើវិស័យសេដ្ឋកិច្ច និងសង្គម៕ អត្ថបទ៖ ទូច សោភ័ណ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
