ស្នងការទទួលបន្ទុកកិច្ចការផ្ទៃក្នុងរបស់សហភាពអឺរ៉ុប បានព្រមានកាលពីថ្ងៃអង្គារថា អឺរ៉ុបប្រឈមមុខនឹងហានិភ័យដ៏ធំនៃការវាយប្រហារភេរវកម្មក្នុងអំឡុងពេលបុណ្យណូអែល ដោយសារតែការរាលដាលចេញពីសង្រ្គាមរវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីនហាម៉ាស។

ការព្រមាននេះ បានកើតឡើងនៅពេលដែលក្រុមអ្នកស៊ើបអង្កេតបារាំង ស៊ើបអង្កេតការវាយប្រហារចុង   សប្តាហ៍ដ៏សាហាវ នៅជិតអគារ Eiffel Tower ក្នុងទីក្រុងប៉ារីស។ សំណួរជាច្រើន ត្រូវបានលើកឡើងអំពីសុខភាពផ្លូវចិត្តរបស់ជនសង្ស័យដែលបានស្បថភក្ដីភាពជាមួយក្រុមរដ្ឋអ៊ីស្លាមជ្រុលនិយម មុនពេលបានចាក់អ្នកទេសចរម្នាក់រហូតដល់ស្លាប់ និងធ្វើឲ្យមនុស្សពីរនាក់ផ្សេងទៀតរងរបួសដោយគេវាយនឹងញញួរ។

ស្នងការទទួលបន្ទុកកិច្ចការផ្ទៃក្នុងសហភាពអឺរ៉ុប អ្នកស្រី Ylva Johansson បានប្រាប់អ្នកយកព័ត៌មានថា៖«ដោយមានសង្រ្គាមរវាងអ៊ីស្រាអែល និងក្រុមហាម៉ាស និងជម្លោះនេះដែលកើតឡើងនៅ នៅក្នុងសង្គមរបស់យើង ហើយ ដោយរដូវកាលវិស្សមកាលជិតចូលមកដល់ មានហានិភ័យដ៏ធំនៃការវាយប្រហារភេរវកម្ម នៅក្នុងសហភាពអឺរ៉ុប»

អ្នកស្រី បាននិយាយថា៖«យើងបានឃើញ (វាកើតឡើង) ថ្មីៗនេះ នៅទីក្រុងប៉ារីស ជាអកុសលយើងបានឃើញវាមុននេះផងដែរ» នៅពេលដែលរដ្ឋមន្ត្រីក្រសួងមហាផ្ទៃសហភាពអឺរ៉ុប បានប្រមូលផ្តុំគ្នា នៅទីក្រុងប្រ៊ុចសែល។ អ្នកស្រី មិនបានផ្តល់ព័ត៌មានលម្អិតអំពីនគរបាលណាម្នាក់ ឬព័ត៌មានសន្តិសុខណាមួយ ដែលអាចនាំឲ្យមានការព្រមានដល់អ្នកស្រីឡើយ។