កងទ័ពអ៊ីស្រាអែល បាននិយាយនៅថ្ងៃពុធនេះថា ខ្លួនកំពុងពិនិត្យមើលឡើងវិញនូវការវាយប្រហារដែលបង្កគ្រោះថ្នាក់ដល់ទាហានលីបង់នៅភាគខាងត្បូង ដែលជាការនិយាយយោងជាក់ស្តែងចំពោះការបាញ់ផ្លោងរបស់អ៊ីស្រាអែល ដែលបានសម្លាប់ទាហានលីបង់ម្នាក់ និងធ្វើរបួសបីនាក់ទៀត កាលពីថ្ងៃមុន។

យោធាអ៊ីស្រាអែល បាននិយាយនៅក្នុងសេចក្តីថ្លែងការណ៍មួយថា៖«កងកម្លាំងប្រដាប់អាវុធលីបង់ មិនមែនជាគោលដៅនៃការវាយប្រហារនោះទេ។ កងកម្លាំងការពារអ៊ីស្រាអែល (IDF) សម្តែងការសោកស្តាយចំពោះឧប្បត្តិហេតុនេះ។ ឧប្បត្តិហេតុនេះដែរ កំពុងត្រូវបានត្រួតពិនិត្យឡើងវិញ។

អ៊ីស្រាអែល និងក្រុមហេសបូឡាលីបង់ប្រដាប់ដោយអាវុធធុនធ្ងន់ បាននិងកំពុងបាញ់ប្រហារគ្នាឆ្លងព្រំដែនលីបង់-អ៊ីស្រាអែល ចាប់តាំងពីការចាប់ផ្តើមនៃសង្រ្គាមរវាងក្រុមប៉ាឡេស្ទីនក្រុមហាម៉ាស និងអ៊ីស្រាអែល កាលពីថ្ងៃទី៧ ខែតុលា។

កងទ័ពលីបង់ បាននិយាយថា ទាហានពលបាលត្រីម្នាក់ ត្រូវបានសម្លាប់ នៅពេលដែលទីតាំងកងទ័ពមួយត្រូវបានបាញ់ផ្លោងដោយអ៊ីស្រាអែល កាលពីថ្ងៃអង្គារ។