ភ្នំពេញ៖ អ្នកស្រី ថោង គឹមអាន កូនស្រីបង្កើតរបស់ព្រឹទ្ធាចារ្យសិល្បៈ ឯម ធាយ បានប្រាប់ឱ្យដឹងថា ការតេស្តលើសំណាកសពម្ដាយរបស់អ្នកស្រី ត្រូវបានរកឃើញថា ឆ្លងមេរោគកូវីដ-១៩ ហើយចៅស្រីម្នាក់អាយុ៥ឆ្នាំ ក៏ត្រូវបានរកឃើញឆ្លងមេរោគនេះផងដែរ។
អ្នកស្រី ថោង គឹមអាន អាយុ ៦៩ឆ្នាំ បានប្រាប់ BTV នៅល្ងាចថ្ងៃនេះថា ក្រុមគ្រូពេទ្យបានពិនិត្យសពទេវនាដនិម្មិត លោកយាយ ឯម ធាយ នៅព្រឹកថ្ងៃនេះ ហើយបានរកឃើញភ្លាមៗថា សពលោកយាយបានឆ្លងមេរោគកូវីដ-១៩។
ក្រៅពីសពលោកយាយ អ្នកស្រី គឹមអាន បញ្ជាក់ថា ក្រុមគ្រូពេទ្យក៏បានរកឃើញចៅស្រីម្នាក់អាយុ ៥ឆ្នាំំ ក៏បានឆ្លងមេរោគកូវីដ-១៩ផងដែរ ហើយត្រូវបានបញ្ជូនទៅសម្រាកព្យាបាលជំងឺកូវីដ-១៩ នៅមណ្ឌលព្យាបាលជំងឺកូវីដ-១៩ នៅ កោះពេជ្រហើយ។
អ្នកស្រី គឹមអាន បានឱ្យដឹងទៀតថា ចំណែកឯសមាជិកក្រុមគ្រួសារជាង ១០នាក់ទៀត ត្រូវបានធ្វើតេស្តហើយ ប៉ុន្តែ រកឃើញមិនឃើញឆ្លងកូវីដ-១៩ទេ ហើយតម្រូវឱ្យស្នាក់នៅដាច់ដោយឡែក ឬធ្វើចត្តាឡីស័កនៅតាមផ្ទះ។
អ្នកស្រី ថោង គឹមអាន បញ្ជាក់បន្ថែមថា លោកយាយ ឯម ធាយ មិនបានធ្វើដំណើរទៅណានោះឡើយមួយរយៈចុងក្រោយ មុនលោកយាយទទួលមរណភាព ដោយសារតែលោកយាយមានសុខភាពទន់ខ្សោយ។
ប៉ុន្តែ អ្នកស្រី គឹមអាន ប្រាប់ថា មានបងប្អូនសាច់ញាតិ និងអ្នកគោរពស្រឡាញ់លោកយាយ បានទៅសាកសួរសុខទុក្ខលោកយាយជាបន្តបន្ទាប់មួយរយៈពេលចុងក្រោយមកនេះ។
អ្នកស្រី ថោង គឹមអាន បានឱ្យដឹងទៀតថា សពលោកយាយ ឯម ធាយ ត្រូវបានក្រុមគ្រូពេទ្យយកទៅបូជានៅឯវត្តទឹកថ្លា បន្ទាប់ពីរកឃើញឆ្លងមេរោគកូវីដ-១៩។
ទេវនាដនិម្មិត លោកយាយ ឯម ធាយ ដែលជាព្រឹទ្ធាចារ្យ និងជាអតីតនាដការីផ្នែករបាំព្រះរាជទ្រព្យ បានទទួលមរណភាពរំលងអាធ្រាត្រឈានចូលថ្ងៃទី១៥ ខែមិថុនា ក្នុងជន្មាយុ ៨៨ឆ្នាំ (ឬ៨៩ឆ្នាំ)៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
